Rýhanı jańǵyrý: Qazaqstan ulttyq arnasynyń kúzgi maýsymǵa tartýy

NUR-SULTAN. QazAqparat – «Qazaqstan» ulttyq telearnasy jańa maýsymda QR Tuńǵysh Prezıdenti - Elbasy N.Á.Nazarbaevtyń «Bolashaqqa baǵdar: Rýhanı jańǵyrý» baǵdarlamasy aıasynda birneshe joba usynady, dep habarlaıdy QazAqparat «Qazaqstan» RTRK» AQ baspasóz qyzmetine silteme jasap.

«8 qyrkúıekten bastap ár salanyń úzdikterin biriktirgen public talk formatyndaǵy «Sen de bir kirpish dúnıege...» jobasy efırge shyǵady. Sondaı-aq, kıeli qazaq dalasynyń ásem tabıǵatymen tanystyratyn «Kieli Qazaqstan. 24 saǵat tabıǵat qushaǵynda» geografııalyq realıtı-shoýy men ár óńirdiń erekshelikterin, tynys-tirshiligin kórsetetin «Ǵajaıyp ólke» jobasy usynylady», - delingen habarlamada.

Odan bólek, zamanaýı Qazaqstannyń jańa tynysyn, búgingi zaman jastarynyń jetistikterin tanytatyn «100 jańa esim» tsıkldi habary men «Latyn alipbii» beınerolıkter toptamasy ázirlenýde.

Jobanyń keshegisi men búgini, ondaǵy qamtylǵan mindetter jaıly «Rýhanı jańǵyrý: eki jyldyq asý» arnaıy telejobasynda kórinis tabady. Al jańǵyrýdyń mańyzdy alǵysharty - dástúr men din sabaqtastyǵy «Iman ózegi» baǵdarlamasy arqyly nasıhattalmaq.

Sondaı-aq, kórermen jańa maýsymnan bastap arna efırinen ótken dáýirdegi tarıhı tulǵalardyń ómiri men shyǵarmashylyǵy jaıly derekti fılmder toptamasy men «Orbulaq shaıqasy» tarıhı telehıkaıasyn tamashalaı alady. Babalar rýhyna taǵzym retinde túsirilgen týyndy kórermen nazaryna osy kúzde jol tartady.

Buǵan deıin habarlanǵandaı, ulttyq arna kúzgi maýsymǵa 14 jańa joba usynady. Odan bólek, kórermen kózaıymyna aınalǵan 10 baǵdarlama jańasha formatta efırge qaıta oralatyn bolady.