Rýhanı jańǵyrý: OQO-da birneshe fılm túsirilmek
Bul shara ońtústiktiń tarıhı shejiresi men qolónershiler, fotosýretshiler, músinshiler, sýretshilerdiń qylqalamynan týyndaǵan óner shyǵarmalary, ádebı shyǵarmalardy nasıhattaý maqsatynda uıymdastyryldy, dep habarlaıdy QazAqparat tilshisi.
«Rýhanı jańǵyrý» baǵdarlamasynyń óńirde júzege asyrylǵan jumystarynyń qorytyndy kórmesin QR Prezıdenti janyndaǵy Jastar saıasaty jónindegi keńestiń HHІ kóshpeli plenarlyq otyrysyna arnaıy kelgen QR Memlekettik hatshysy Gúlshara Ábdiqalyqova, QR Din isteri jáne azamattyq qoǵam mınıstri Darhan Káletaev, QR Mádenıet jáne sport mınıstri Arystanbek Muhamedıuly, OQO ákimi Janseıit Túımebaev pen plenarlyq otyrysqa qatysýshy elimizdiń kóshbasshy jastary tamashalady.
Keshendi kórmede kelýshiler nazaryna oblystan qasıetti, kıeli jerlerdiń tizimine engizilgen tarıhı-mádenı nysandardyń, mádenı is-sharalardyń, túsirilgen kórkem, anımatsııalyq, derekti fılmderdiń kórmesi men belgili qylqalam sheberleriniń shyǵarmalary kórsetildi. Sondaı-aq, qolóner sheberleriniń jasaǵan buıymdary, músinshilerdiń músinderi, oblystyń kórkem jerleri beınelengen fotosýretter qoıyldy. 9 bólikten turatyn kórmede jergilikti aqyn-jazýshylardyń kitaptary, ulttyq kıimder jáne Qazaqstandaǵy 100 jańa esim jobasyna engen azamattar týraly týyndylar usynyldy.
Aıta keteıik, jalpy Elbasynyń «Bolashaqqa baǵdar: Rýhanı jańǵyrý» maqalasy aıasynda Ońtústik Qazaqstan oblysynda bir jyl ishinde 4370 is-shara uıymdastyryldy. Osynyń nátıjesinde óńir baǵdarlamalyq maqalany júzege asyrýda oblystar arasynda aldyńǵy qatarǵa shyqty. Sonymen qatar, oblys «Týǵan jer» jobasy boıynsha 31 mlrd 467 mln teńgeni quraıtyn 577 nysan boı kóterip, rekordtyq kórsetkishke ıe boldy. Olardyń qatarynda bilim, densaýlyq, sport, mádenıet jáne áleýmettik ǵımarattar bar.
Budan bólek, tarıhı-mádenı muralardy nasıhattap, jastarǵa patrıottyq tárbıe beretin «Kóne jetigenniń syry» atty 10 serııaly telehıkaıa men «Kıeli Qazyǵurt», «Otyrardy qorǵaý», «Kúsh atasy - Qajymuqan» atty anımatsııalyq jáne «Uly Jibek jolyndaǵy eskertkishter» atty derekti fılmder túsirilip, qoǵam nazaryna usynyldy.
Aldaǵy ýaqytta «Rýhanı jańǵyrý» baǵdarlamasy aıasynda «Ordabasy taýy» qoryq murajaıyna el birligin dáriptegen qazaq halqynyń Tóle, Qazybek, Áıteke bılerine monýment ornatý jáne «Úsh bı» kópserıaldy fılmi men «Ordabasy - birliktiń týy», «Kóne Túrkistan», «Shymkent tarıhy», «Oqsyz oqıǵasy» atty anımatsııalyq fılmder túsirý josparlanýda.
