Rýhanı jańǵyrý: Qyzylorda oblysynyń tájirıbesi óńirlerge tanystyryldy

QYZYLORDA. QazAqparat - «Rýhanı jańǵyrý» baǵdarlamasyn júzege asyrýdaǵy Qyzylorda oblysynyń tájirıbesi respýblıkaǵa taratylady, dep habarlaıdy QazAqparat tilshisi.

«Rýhanı jańǵyrý» qazaqstandyq qoǵamdyq damý ınstıtýty» KEAQ uıymdastyrýymen «Rýhanı jańǵyrý» baǵdarlamasyn iske asyrý boıynsha respýblıkalyq onlaın semınar ótti. Semınarǵa baǵdarlamany júzege asyrýǵa jaýapty memlekettik organdardyń basshylary, oblys, qala jáne aýdan ákimderiniń orynbasarlary qatysty.

Vebınar jumysy barysynda birneshe negizgi máseleler qamtyldy. Atap aıtqanda, olardyń qatarynda Rýhanı jańǵyrý» baǵdarlamasyn halyq arasynda keńinen nasıhattaý boıynsha jumystardy jetildirý, baǵdarlamany ǵylymı súıemeldeý, sarapshylyq jáne ádistemelik qamtamasyz etilýin ózektendirý bar. Vebınar barysynda Qyzylorda oblysynyń ǵylymı negizdelgen jumys baǵytynyń tájirıbesi óńirlerge úlgi esebinde tanystyryldy.

Mańyzdy jıynda sóz alǵan oblystyq ishki saıasat basqarmasynyń basshysy Mıra Qazbekova Syr óńirinde atalǵan baǵdarlama boıynsha jasalyp jatqan jumystardy baıanady. Óńirdegi «Rýhanı jańǵyrý» ortalyǵy bıylǵy jyldyń basynda qaıta quryldy. Búginde onda 19 maman qyzmet atqarady. Onyń 2-i ǵylym kandıdaty, 1-i PhD doktory jáne 2-i ǵylym magıstri.

Ortalyqty qaıta qurý jáne qurylymyn jasaqtaý barysynda ǵylymı súıemeldeý jumystaryna erekshe nazar aýdaryldy. Maqsat - baǵdarlamany túsindirýde ǵylymı negizdelgen keshendi jumystardy júrgizý jáne túrli uıymdar men mekemelerge ádistemelik qoldaý kórsetý. Ortalyqtyń úılestirýimen oblysqa belgili ǵalymdardy biriktirgen «Ǵylymı-sarapshylyq» top quryldy. Top músheleri búginde baǵdarlamanyń ǵylymı-teorııalyq jáne ádistemelik jaǵynan negizdeýge qoldaý kórsetýde. «Aıta ketsek, «Rýhanı jańǵyrý» baǵdarlamasy men Prezıdent Qasym-Jomart Toqaevtyń «Táýelsizdik bárinen qymbat» maqalasy negizinde Táýelsizdigimizdiń 30 jyldyǵy aıasynda «Syr jurty» tanymdyq-passıonarlyq jobasy ázirlengen bolatyn. Jobanyń basty maqsaty -óńirdiń tarıhı-saıası jáne mádenı-rýhanı daralyǵyn aıshyqtaý arqyly óskeleń jas urpaqty otanshyldyq rýhta tárbılep, bilim men ǵylymǵa qyzyǵýshylyǵyn arntyrý. Oǵan qosa táýelsizdiktiń qundylyqtary arqyly, jańǵyrý kezeńindegi adamnyń jańa bolmysyn qalyptastyrýǵa nazar aýdarylady», - dedi basqarma basshysy.

Basqarma basshysy baǵdarlamany teorııalyq ári ádistemelik qamtamasyz etý úshin respýblıkalyq deńgeıde ǵylymı-sarapshylyq keńes qurýdyń, óńirlerde Ǵylymı-sarapshylyq toptardy qalyptastyrý qajettigi týraly usynysyn ortaǵa saldy. «Bul - baǵdarlamanynyń ǵylymı, sarapshylyq jáne ádistemelik qamtamasyz etilýin arttyryp, nátıjeli jumystarǵa qol jetkizýdiń eń tıimdi joly», - dep atap ótti ol. Eske salsaq, budan buryn Qyzylordada «Rýhanı jańǵyrý» baǵdarlamasy aıasynda qazaq tiline aýdarylǵan 100 kitap buryshy ashyldy.