«RÝHANI JAŃǴYRÝ»: Dızaınerler baıqaýynyń Gran-prı ıegeri óziniń jeńisi týraly aıtyp berdi
«Men baıqaýǵa qatysqan basqa da úmitkerlerdiń eńbegin kórip shyqtym. Onda shynynda da, biregeı týyndylar ákelingen eken. Ózimniń zaıybyma solardyń arasynan meniń eńbegimdi taba alasyń ba dep suraq qoıdym. Jubaıym birinshi oryn alǵan astanalyq Madına Muqanovanyń eńbegin kórsetti. Álbette, ol meniń eńbegim bolmasa da, shynaıy myqty týyndyny zaıybym baıqaı bildi. Men de bas júlde Madınanyń enshisinde bolar dep oıladym. Ózgeler de baryn salǵanymen, baǵdarlamanyń oıyn durys jetkize bilgen eńbekter jaryp shyqty. Bálkim, qatysýshylardyń keıbiri keremet sýret salyp bergen bolar, biraq dızaınerlik degen sýretshilik emes. Ol da shyǵarmashyl adam, biraq boıaýdyń has sheberi emes. Bizden naqty «Rýhanı jańǵyrý» baǵdarlamasynyń oıyn týra jetkizý talap etildi», - deıdi Denıs Romanov.
Denıs Pavlodar qalasynda turady. Qazirgi ýaqytta Eýrazııa ýnıversıtetiniń Innovatsııalyq jarnama jáne marketıng ortalyǵynyń jetekshi mamany bolyp eńbek etedi. «QazAqparat» HAA baıqaýy týraly tanysy arqyly bilgenin, baıqaýǵa qatysý úshin Prezıdenttiń «Bolashaqqa baǵdar: Rýhanı jańǵyrý» maqalasyn tolyǵymen oqyp shyqqanyn aıtady.
Aqyrynda, Denıs alty eskız daıyndap shyǵardy. Baıqaýdyń qorytyndysy jarııalanǵan saltanatty sharada óz eńbegi týraly qazylar alqasynyń oıyn bilip alǵan eken. Denıstiń ónerin shynaıy baǵalaǵan ádil qazylar alqasy oǵan ary qaraı dızaınerlik ónerdi damytýǵa bolatynyn aıtqan. Baıqaýdyń sharty boıynsha baǵdarlamanyń barlyq alty taraýyn qamtý mindetti emes. Tek solardyń birin tańdap alýǵa bolar edi. Alaıda pavlodarlyq alty birdeı eskızdi daıyndaýǵa bel sheshipti.
Denıs salǵan sımvoldardyń barlyǵyn bir dóńgelengen geometrııalyq fıgýra baılanystyrady. Al onyń ishinde globýs (Elbasy maqalasynda jazǵandaı, jahandyq álem maǵynasyn bildiredi) pen spıral (sananyń ashyqtyǵy), shańyraq (ulttyq biregeılikti saqtaý), magıstranttardyń qalpaǵy (bilim) beınelengen. Eń qıyny, Denıs úshin sananyń ashyqtyǵyn bere bilý qıynǵa soqqan kórinedi. Pragmatızmniń beınesi de dızaıner úshin ońaıǵa túspegen.
Denıs Romanov ózin-ózi asqan shebermin deýden aýlaq. Pikirine qulaq assaq, oǵan eń bastysy tájirıbe kómektesken. Ózi 10 jyldan beri dızaıner bolyp eńbek etedi. Birneshe jyl boıy klıenttermen jumys isteı otyryp, aldyna kelgen adamdardyń oıyn oqyp turatyndaı týyndylardy dúnıege ákelý Denıstiń qolynan keletin bolyp shyqty.
Jergilikti oqý ornynda stýdent bolyp júrip-aq, ol joǵarǵy oqý ornynda jumysyn bastap ketken. Denıske sol kezdiń ózinde JOO-nyń gazetin ázirleý, bannerler men býkletterdi sándeý, logotıpterdi oılastyryp shyǵarý, foto túsirip oǵan montaj jasaý mindeti júktelipti. Bir sózben, aqyl-oıy júırik dızaınerdiń kómegine kóp adam júgingen. Tapsyrystar jeterlik. Jergilikti «Ertis» fýtbol komandasynan da jıi usynystar túsip jatady. Pavlodardyń kóshelerinde Romanov ázirlegen logotıpter qala kórkine aınalǵan. 2017 jyly «Astana» jáne «Qaırat» komandalary men «Atyraý» jáne «Qaırat» komandalarynyń arasyndaǵy matchtardyń baǵdarlamasyn dızaınerlik úlgide dál osy Denıs ázirlep bergen.
Eske sala ketsek, 21 jeltoqsan kúni «QazAqparat» HAA jarııalaǵan dızaınerler baıqaýynyń jeńimpazdary anyqtalǵan bolatyn. Konkýrsqa jumystardy qabyldaý 1 qarashadan bastalyp 15 jeltoqsanǵa deıin jalǵasaqn edi. Usynylǵan jumystar «Bilim kýlti», «Básekelik qabilet», «Pragmatızm», «Ulttyq biregeılikti saqtaý», «Qazaqstannyń revolıýtsııalyq emes, evolıýtsııalyq damýy», «Sananyń ashyqtyǵy» sekildi taqyryptarǵa sáıkes qabyldandy. Árbir qatysýshy nemese ujym atalǵan 6 baǵyttyń árqaısysyna tek 1 ǵana jumysyn usynýǵa múmkindik aldy. Baıqaýdyń bas júldesin Pavlodar qalasynan kelgen Denıs Romanov jeńip alsa, júldeli birinshi orynǵa ıe bolǵan Nazarbaev ýnıversıtetiniń stýdenti Madına Muqanovaǵa «QazAqparat» HAA bas dırektory Asqar Ýmarov 1,5 mıllıon teńgeniń sertıfıkatyn tabys etken bolatyn. Ekinshi oryndy (1 mıllıon teńge) Pavlodar qalasynan kelgen Rýstam Sarımov utyp alsa, úshinshi oryn L.Gýmılev atyndaǵy EUÝ stýdenti Sáýle Jıenqulovaǵa (500 myń teńge) buıyrdy.
