«Rýhanı jańǵyrý» boıynsha keshendi jumystar jalǵasady - Memleket basshysy

ASTANA. QazAqparat - «Rýhanı jańǵyrý» baǵdarlamasy boıynsha keshendi jumystar jalǵasady. Bul týraly búgin QR Parlamenti palatalarynyń birlesken otyrysynda Memleket basshysy Nursultan Nazarbaev aıtty, dep habarlaıdy QazAqparat tilshisi.

«Biz «Rýhanı jańǵyrý» qoǵamdyq sanany jańǵyrtý baǵdarlamasyn júzege asyrý boıynsha keshendi jumystardy jalǵastyramyz. Mańyzdy mindetterdiń biri - tarıhı-mádenı muralarymyzdyń qorǵalýyn qamtamasyz etý, tanymaldyǵyn arttyrý»,- dedi QR Prezıdenti. 

Osy oraıda Memleket basshysy Parlament qaraýynda atalǵan baǵdarlamany utymdy júzege asyrýdy kózdeıtin zań jobasy jatqanyn eske saldy.

«Onyń qabyldanýy álemdik úzdik tájirıbelerge sáıkes tarıhı qasıetti nysandardy tıimdi damytýǵa jáne qorǵaýǵa septigin tıgizetin bolady», - dedi Elbasy.

Aıta ketý kerek, búgin Memleket basshysy QR Parlamenti palatalarynyń birlesken otyrysyna qatysyp, turǵyn úı-kommýnaldyq sharýashylyq salasyndaǵy máselelerdi sheshýdi tapsyrdy. Sonymen qatar, kelesi Joldaýda qandaı máseleler qozǵalatynyn aıtty. Elbasynyń aıtýynsha, Úkimet agrarlyq ǵylymdy damytýǵa nazar aýdarýy tıis.