Rýhanı jańǵyrý: Bıyl Qaraǵandy oblysynda 238 joba iske asyrylady
Bul jaıly baǵdarlamany júzege asyrý boıynsha aımaqtyq jobalyq keńseniń jetekshisi Gúlnár Qurbanbaeva málimdedi.
- «Rýhanı jańǵyrý» baǵdarlamasy - Elbasynyń bastamasymen qabyldanǵan ulttyq deńgeıdegi aýqymdy joba. Ol salalardyń barlyǵyn qamtýymen erekshelenedi. Bul joba qoǵamnyń ıdeologııalyq platformasy ispettes, - dedi Gúlnár Qurbanbaeva aımaqtyq kommýnıkatsııalar qyzmetinde ótken brıfıng barysynda. - «Rýhanı jańǵyrý» baǵdarlamasynyń jalpy respýblıkalyq reestrine engen jobalardyń sany boıynsha Qaraǵandy oblysy eń úlken pýl usynyp otyr. 2017-2022 jyldary júzege asyrylady dep josparlanyp otyrǵan jalpy somasy 12,3 mlrd teńgeni quraıtyn 430 joba, qosymsha joba jáne sharalar qurylǵan.
Qarjylandyrý túrli kózderden jumyldyrylady dep josparlanýda: bıýdjet, demeýshiler, JOO jáne t.b.
Jobalardy irikteý úshin 2017-shi jyly aımaqta Azamattyq bastamalar kúnderi ótkizildi.
- Osyndaı tórt kún ótkizdik, olardyń ekeýin biz jyljymaly túrde uıymdastyrdyq. Sharanyń maqsaty - bizdiń jerlesterimizdi qandaı máseleler tolǵandyratyny, óz aýyldarynda, oblysta, jalpy elimizde neni ózgertý mańyzdy ekenin túsiný boldy, - dep atap ótti Gúlnár Qurbanbaeva. - Ortaǵa salynǵan 40-tan astam bastama jobalyq keńseniń óńdep, talqylaýyna tústi, nátıjesinde olardyń basym bóligi reestrge engizildi.
Oblysta sonymen qatar quramyna ǵalymdar men qoǵamdyq qaıratkerler engen «Rýhanı jańǵyrý» baǵdarlamasy boıynsha saraptama keńesi quryldy.
2017-shi jyly 169 joba jáne quny 2,3 mlrd teńgeni quraǵan aktsııalar iske asyryldy. Bul somadan 1,8 mlrd teńgeni bıznes salymdary qurady. Jobalyq keńseniń baǵamdaýy boıynsha olardyń arasynda anaǵurlym mańyzdy bolǵandary: ǵulama qoǵam qaıratkeriniń 350 jyldyǵyna arnalǵan «Qaz daýysty Qazybek bı jolymen: Babalarǵa taǵzym» atty halyqaralyq avtokerýen; «Sheberler qalashyǵy - Gorod masterov» sheberler art-festıvali. Sonymen qatar Qarqaralyda jas týrıster stantsııasy ashyldy. Oqý jylynyń basynda Temirtaý qalasynyń 10 myńnan astam oqýshylary óz-ózderine bolashaqqa hat jazdy - bul aktsııaǵa eshqandaı shyǵyndar qajet bolmady.
- Biz aktsııalar qur kózboıaýshylyq úshin ǵana jasalmaýyna umtylamyz. Uıymdastyrýshylarmen jumys atqaramyz, adamdarǵa ol ne úshin qajet ekenin túsindirýge shaqyramyz - adamdardy qur bosqa jınaýdyń qajeti joq. Eger paıdal is-áreket koeffıtsenti týraly aıtar bolsaq, 10 sharanyń 9-y jaqsy nátıje berdi dep oılaımyn, - dep sanaıdy jobalyq keńseniń jetekshisi.
2018-shi jylǵa 4,7 mlrd teńgege 238 jobany iske asyrý josparlanǵan. Olar baǵdarlamanyń tórt baǵyty boıynsha taratylǵan: «Tárbıe jáne bilim», «Atameken», «Rýhanı qazyna», «Aqparat tolqyny». Aldaǵy josparda: Qaraǵandyda balalar týrızmin damytý ortalyǵyn ashý; Balqash qalasynda múgedekterge kóliktik kómek qyzmetin qurý; oblystyń tanymal sportshylarynyń qatysýymen «Týǵan jer» sporttyq kerýenin uıymdastyrý; arheologııalyq kartany basyp shyǵarý; «Qaraǵandynyń teatraldy mýzykalyq túnderi» halyqaralyq festıvalin ótkizý jáne t.b.
