Rýhanı jańǵyrý: Bıyl Qaraǵandy oblysynda 1 500-den astam joba júzege asyrylady
2021 jylǵa barlyǵy 1 500-den astam túrli jobalar josparlanǵan, dep habarlaıdy QazAqparat tilshisi.
Bul týraly oblys ákiminiń orynbasary Abzal Núkenovtyń tóraǵalyǵymen ótken «Rýhanı jańǵyrý» saraptamalyq keńesiniń onlaın otyrysynda aıtyldy. Sondaı-aq, osy jyldyń alǵashqy úsh aıyndaǵy baǵdarlamany iske asyrý qorytyndylary talqylanyp, bolashaqta atqarylatyn jumystardyń basym baǵyttary aıqyndaldy.
«Bıyl bizde 167 aýqymdy is-shara josparlanǵan. Bıylǵy jyldyń birinshi toqsanynda barlyǵy 649 is-shara ótkizildi. Olardyń negizgileri – Shet aýdanynyń Moıynty aýylynda Tanybaı batyrǵa eskertkish ornatý, «Saryarqanyń jańa esimderi», «Meniń atam... meniń ájem», ulttyq kıimder chellendji, «Áz-Naýryz» aqyndar aıtysy jáne t.b. bar. Sondaı-aq ulttyq qundylyqtardy nasıhattaýǵa baǵyttalǵan jańa jobalar iske asyrylýda. Atap aıtqanda, «Alash aforızmderi» aıdary, «Azamat» baǵdarlamasy jáne «Ulttyq qyzmet» jobasy. Bul baǵyttaǵy jumystar jalǵasatyn bolady», – deıdi «Rýhanı jańǵyrý» jobalyq keńsesiniń jetekshisi Aıtbaı Jumaǵulov.
Osy jylǵa josparlanǵan eń iri is-sharalar qatarynda «Joshy han» tarıhı-mádenı kesheniniń ashylýy, Qaraǵandy oblysynyń qasıetti jerleriniń smart-kartasyn ázirleý, «Ultqa qyzmet», «Altyn aspap» jobalary jáne «Jez kıik» halyqaralyq mýzykalyq festıvali bar. Olardyń barlyǵy táýelsizdiktiń 30 jyldyǵyn merekeleý aıasynda ótedi.
«Rýhanı jańǵyrý» jobalyq keńsesi basshysynyń baıandamasyn tyńdaǵan Abzal Núkenov «Joshy han» tarıhı-mádenı kesheniniń ashylýyna qanshalyqty daıyn ekenin surady.
«Ótken jyldyń naýryz aıynda tarıhı-mádenı keshenniń qurylysy bastaldy. Qazirgi ýaqytta ol 90% daıyn. Qazir abattandyrý, syrtqy kommýnıkatsııalarǵa qosylý jumystary júrip jatyr. Sondaı-aq, ǵalymdarmen birlesip «Uly ulys» ekspozıtsııasy ázirlenýde», – dedi Jezqazǵan ákiminiń orynbasary Zına Aqylbekova.
Otyrysta is-sharaǵa qatysýshylar arasynda pikir almasý barysynda aıtylǵan barlyq usynystar nazarǵa alyndy.
Atap aıtqanda, oblystyń oqý oryndarynda «Rýhanı jańǵyrý» baǵdarlamasyn júzege asyrý jumystaryn kúsheıtý usynyldy.
«Bilim basqarmasyna oqý oryndarynda «Rýhanı jańǵyrý» baǵdarlamasy boıynsha jumysty kúsheıtý jónindegi saraptamalyq komıssııanyń usynysyn qaraýdy jáne bul máseleni baqylaýǵa alýdy tapsyramyn. Biz aı saıyn kezdesip, atqarylǵan jumystardy talqylaıtyn bolamyz», – dedi Abzal Núkenov.
Ol sondaı-aq 2021 jylǵa arnalǵan «Rýhanı jańǵyrý» baǵdarlamasyn sapaly ári tıimdi iske asyrýdy qamtamasyz etýdi tapsyrdy. Baǵdarlamanyń negizgi baǵyttaryn nasıhattaý úshin aqparattyq-túsindirý jumystaryn jalǵastyrý qajet ekeni aıtyldy.
Otyrysty qorytyndylaı kele, oblys ákiminiń orynbasary «Rýhanı jańǵyrý» baǵdarlamasy – qoǵam ómiriniń barlyq salalaryna qatysty ulttyq deńgeıdegi keshendi jáne aýqymdy joba ekenin atap ótti.
