«Rýhanı jańǵyrý»: Batys Qazaqstannan Inderge deıin halyqaralyq ekspedıtsııa uıymdastyrylýda
ORAL. QazAqparat - «Rýhanı jańǵyrý» baǵdarlamasy aıasynda Batys Qazaqstannan Inderge deıin halyqaralyq ekspedıtsııa uıymdastyrylyp jatyr. Bul týraly búgin óńirlik kommýnıkatsııalar qyzmetinde málim etildi, dep habarlaıdy QazAqparat tilshisi.
Jáńgir han atyndaǵy Batys Qazaqstan agrarlyq-tehnıkalyq ýnıversıteti bıotehnologııa jáne tabıǵat paıdalaný ǵylymı-zertteý ınstıtýtynyń dırektory, geografııa ǵylymdarynyń kandıdaty, professor, «Qazaqstan ulttyq geografııa qoǵamy» RQB múshesi Qajymurat Ahmedenovtiń aıtýynsha, «Inder - Oral óńiriniń bolashaǵy bar geoparki» atty halyqaralyq ǵylymı-tanymdyq ekspedıtsııa 6-15 maýsym aralyǵynda ótip, on kúnge sozylmaqshy.
Jáńgir han atyndaǵy BQATÝ-dyń 55 jyldyǵyna oraılastyrylǵan ekspedıtsııaǵa batysqazaqstandyqtarmen qatar úsh birdeı belgili reseılik ǵalym qatysqaly otyr. Atap aıtqanda, paleontolog, geologııa-mıneralogııa ǵylymdarynyń kandıdaty, RǴA janyndaǵy paleontologııa qoǵamy Ýlıanovsk bólimshesiniń tóraǵasy Vladımır Efımov, gerpetolog, RǴA Edil boıy basseıni ekologııasy ınstıtýty gerpetologııa jáne toksınologııa zerthanasynyń aǵa ǵylymı qyzmetkeri Andreı Bakıev jáne zoolog, «Samarskıı zoopark» mekemesi dırektorynyń zooveterınarlyq bóligi jónindegi orynbasary Aleksandr Kýzovenko osy óńirdiń tabıǵatyn, janýarlar álemin zertteýge óz úlesterin qospaqshy.
Ekspedıtsııa maqsaty - tabıǵı jáne tarıhı nysandar jóninde naqty ǵylymı málimetter jınaqtaý. Joryq barysynda Tasqala aýdanyndaǵy Úlken Eshkitaýdan bastap Atyraý oblysyndaǵy Inder kóli men taýy, onyń tóńiregi, Bókeı ordasy aýdanyndaǵy Aralsor kóli men Orda toǵaıyn keshendi túrde zertteý josparlanǵan. Sonymen qatar jergilikti turǵyndarmen kezdesip, óńir tabıǵaty men tarıhyna qatysty derekterdi de jınastyrý kózdelip otyr.
Brıfıng barysynda reseılik paleontolog-ǵalym Vladımır Efımov Inderdi zertteý arqyly ony Qazaqstanda týrıster baratyn geoparkqa aınaldyrýǵa bolatyndyǵyn jetkizdi. Sol sekildi Han ordasyndaǵy qaraǵaı ormandaryn da zertteýdiń mańyzy zor.
Brıfıngte atalyp ótilgenindeı, Inderde baılyq qory mol. Ony ulttyq park retinde qurýmen birge bulaqtary men tuzdy sorlaryn emdik maqsatta paıdalanýǵa bolady.
