«Rýhanı jańǵyrý»: «Baqytty bala» baıqaýy jańa talanttardy elge tanytady
AQTÓBE. QazAqparat - Aqtóbede alǵash ret «Baqytty bala» baıqaýy ótkiziledi. Baıqaýdy uıymdastyrýǵa Dımash Qudaıbergenniń ata-anasy, «Dımash Alı» shyǵarmashylyq ortalyǵy atsalysty, dep habarlaıdy QazAqparat tilshisi.
Bıyl Aqtóbede «Baqytty bala» jyly jarııalanǵan bolatyn. Elbasy Nursultan Nazarbaevtyń «Rýhanı jańǵyrý», «Týǵan jerge taǵzym» memlekettik baǵdarlamalary aıasynda Aqtóbede alǵash ret ashyq balalar vokaldyq festıval-konkýrsy uıymdastyryldy. Konkýrsqa barlyǵy 400-den astam bala qatysýǵa ótinish bildirgen. Olardyń 20-sy irikteldi.
«Ádilqazylar bir jerde otyryp, talanttardy birge tyńdaǵan joq. Beınematerıaldar ádilqazylardyń árqaısysyna jiberilip, olar ózderi jeke tyńdady, usynysyn aıtty. Bir-birine 95 paıyzy saı kelip, barlyǵy 16 qatysýshy iriktelýi tıis edi. Biraq talantty balalar óte kóp. Barlyǵy 20 qatysýshy tańdaldy. Olardyń basym bóligi Qazaqstannyń qalalarynan, sonymen qatar Reseı, Grekııa, Ózbekstan, Ýkraına elderiniń talanttary keldi. Aqtóbeden 4 bala qatysady», - dedi «Dımash Alı» shyǵarmashylyq ortalyǵynyń jetekshisi Qanat Aıtbaev.
10-15 jastaǵy ónerpazdar aldymen óz ana tilinde án shyrqap, keıin álemdik hıt ánderdi oryndady. Ádilqazylar arasynda pedagogtar basym. Olardyń arasynda Dımash Qudaıbergenniń ustazy Marat Áıtimov, Qazaqstannyń estrada ánshisi Jeńis Ysqaqova, Ózbekstannyń eńbek sińirgen ártisi Nodıra Permatova, Ýkraınanyń altyn daýysy Vlad Sytnık, Túrkııa ánshisi Emre ıÝselen bar.
«Baqytty bala» baıqaýy 2019 jyly Aqtóbede, 2020 jyly Astanada, 2021 jyly Almaty qalasynda ótkizilýi múmkin. Bul baıqaýdy Aqtóbeniń brendine aınaldyrý maqsatynda eń joǵary dárejede uıymdastyrdyq», - dedi Aqtóbe qalasy ákiminiń orynbasary Kúlparshyn Aıdarhanova.
Aıta keteıik, Dımash Qudaıbergen «Baqytty bala» baıqaýynda aqyldastar alqasynda bolyp, ózi ataýly júldemen ónerpazdardyń birin marapattaıdy. Baıqaý kontsertine kirý úshin Alǵa balalar úıi men patronattyq tárbıedegi balalarǵa tegin bılet taratylǵan. Ári baıqaýdyń telenusqasy túsirilmek. Dımash Qudaıbergenniń «Bastaý» kontsertin uıymdastyrǵan rejısser Anna Oboıanskaıa gala kontsertte shoý baǵdarlama bolatynyn jetkizdi. Bas júldege 2 mıllıon teńge, І orynǵa 1,5 mıllın teńge, ІІ jáne ІІІ oryndarǵa 750-500 myń teńge beriledi.
