«Rýhanı jańǵyrý» baǵdarlamasynyń ambassadorlary anyqtaldy

NUR-SULTAN. QazAqparat – Elordada «Azamattyq alań» pikirtalas alańynyń birinshi otyrysynda «Rýhanı jańǵyrý» baǵdarlamasy ambassadorlarynyń esimderi jarııa etildi, dep habarlaıdy QazAqparat tilshisi.

Otyrysta QR Aqparat jáne qoǵamdyq damý vıtse-mınıstri Ǵabıdolla Ospanqulov mınıstrdiń atynan ambassadorlarǵa kýálikter tabys etti. Sonymen «Ulttyq biregeılikti saqtaý» baǵytynyń ambassadory memleket jáne qoǵam qaıratkeri, ǵalym Myrzataı Joldasbekov boldy. Al «100 jańa tulǵa» jobasynyń jeńimpazy, fızık Ernur Rysmaǵambetov «100 jańa tulǵa» arnaýly jobasynyń ambassadory bolsa, ektnograf, ulttyq as máziriniń sarapshysy Áıgerim Musaǵajınova «Ulttyq biregeılikti saqtaý» baǵytynyń ambassadory atandy.

«Qazaqstannyń Ulttyq mýzeıi janyndaǵy «Halyq qazynasy« ǵylymı-zertteý ınstıtýty mádenı mura bóliminiń jetekshisimin. Shamamen 15 jylǵa jýyq ýaqyt boıy qazaqtyń ulttyq as mázirin zerttep kelemiz. Búginde bizde qazaq ashanasy taǵamnyń birneshe túrimen ǵana shekteledi delingen stereotıp bar. Bizdiń mindetimiz - qazaq as máziriniń óńirlik erekshelikterin kórsetý jáne qazaqtyń as mázirin búkil álem bilýi úshin brendke aınaldyrý. «Qazaqy as: dástúr men dám« dep atalatyn kitap shyǵardyq. Onda as daıyndaý tehnologııasyn kórsete otyryp, 50-ge jýyq retsept usyndyq», - dedi Áıgerim Musaǵajınova.

Ambassador atanǵan ózge de tanymal tulǵalar boldy. Atap aıtqanda, Ulttyq aýdarma bıýrosynyń jetekshisi Raýan Kenjehanuly «100 jańa oqýlyq» jobasy, kásipker Ivan Saýer «Týǵan jer» arnaýly baǵdarlamasy, Halyqaralyq túrki akademııasynyń prezıdenti Darhan Qydyráli «Túrki áleminiń genezısi» baǵytynyń ambassadory atandy.