«Rýhanı jańǵyrý» baǵdarlamasynan mazmuny taıaz kóptegen shara alynyp tastaldy
«3 jylda «Rýhanı jańǵyrý» baǵdarlamasyn basqarýdyń ınstıtýtsıonaldyq negizi tolyqtaı qalyptastyryldy. Barlyq óńirde jobalyq keńseleler ashylyp, ár jerdiń ereksheligine baılanysty mazmundy josparlar quryldy. Árıne, kez kelgen bastamanyń baıandylyǵy bul sol bastamaǵa janashyr mamanǵa baılanysty. Sondyqtan da bul máselege úlken kóńil bólinip keledi. Osyǵan oraı mınıstrlik janynan arnaıy qoǵamdyq damý ınstıtýtynyń qyzmeti jolǵa qoıyldy. Oǵan ǵylymı-saraptamalyq mindetten bólek óńirlik keńselelerdegi mamandarǵa ádistemelik kómek kórsetý jumysy júktelgen bolatyn», - dedi ol Ortalyq kommýnıkatsııalar qyzmetindegi baspasóz máslıhaty barysynda.
Onyń atap ótýinshe, baǵdarlamanyń 6 baǵyt boıynsha 13 joba bekitilip, olardyń aıasynda ondaǵan myń sharalar ótti.
«Árıne, bul jerde biz úshin mańyzdysy san emes, sapa. Óıtkeni, tájirıbe kórsetkendeı keıbir jerlerde eseptilik, naýqanshylyq sııaqty úrdister oryn alǵany jasyryn emes. Bul týraly jyl basynda ótken memlekettik komıssııanyń otyrysynda naqty aıtyldy. Nátıjesinde óńirlerdegi barlyq is-sharalarǵa qaıta taldaý jasalyp, rýhanı jańǵyrýǵa múldem qatysy joq, mazmuny taıaz, maqsaty suıyq kóptegen sharalar alynyp tastaldy. Máselen, byltyrǵy jyldyń josparynda 229 is-shara kózdelgen bolsa, bıyl barlyǵy - 97 tarmaq. Bul jerde taǵy da qaıtalap aıtaıyn, is-sharalardyń sapasyna úlken mán berilip otyr», - dedi Bolat Tilepov.
Vıtse-mınıstr bul mindetti sheshý úshin olardy júzege asyrýdyń 3 baǵyty belgilengendigin aıtty.
«Birinshi baǵyt - tulǵalyq damý. ıAǵnı, oǵan bilimniń saltanat qurýy, básekege qabilettilik, sananyń ashyqtyǵy, pragmatızm sııaqty qaǵıdattar kirdi. Ekinshi baǵyt - bul ulttyq biregeılik pen halyqaralyq mártebeni arttyrý. Úshinshi baǵyt - memlekettiń, azamattyq qoǵamnyń jáne jergilikti qoǵamdastyqtardyń damýy. Al endi osynyń barlyǵyn iske asyrý úshin ortalyq memlekettik organdar men jergilikti atqarýshy organdarǵa arnaıy usynymdar ázirlenip, jetkizildi», - dedi ol.
