«Rýhanı jańǵyrý» baǵdarlamasyna ózgerister engizemiz - Danııar Esın

NUR-SULTAN. QazAqparat - Búgin elordada Zoom platformasy arqyly «Rýhanı jańǵyrý» baǵdarlamasy aıasynda forsaıttyq zertteýler nátıjesin talqylaýǵa arnalǵan dıalogtyq konferentsııa ótti, dep habarlaıdy QazAqparat tilshisi.

«Bolashaq qazaqstandyqtardyń beınesi «Rýhanı jańǵyrý« baǵdarlamasynyń 6 tujyrymdamalyq fýnktsııasy negizinde jeke tulǵa retinde damýmen tyǵyz baılanysty. Bul jerdegi negizgi damý baǵyttary - básekege qabilet, sananyń ashyqtyǵy, pragmatızm jáne ulttyq qundylyqtardy saqtaý. Sondyqtan da «Rýhanı jańǵyrý« baǵdarlamasyna jańa ózgerister engizgimiz keledi. Sebebi qoǵamdy jańǵyrtý - árbir azamatty jáne búkil ultty jańǵyrtý degen sóz», - dedi «Rýhanı jańǵyrý» Qazaqstannyń qoǵamdyq damý ınstıtýtynyń basqarma tóraǵasy Danııar Esın onlaın konferentsııada sóılegen sózinde.

Sondaı-aq, atalǵan sharada «Rýhanı jańǵyrý» baǵdarlamasynyń aldaǵy damý baǵyttary aıtyldy.

«Bul - jaqsy bastama. Jyldyń sońynda jaqsy nátıje kóretinimizge senimdimin. Jaqynda Memlekettik hatshy Qyrymbek Kósherbaevtyń tóraǵalyǵymen ulttyq sanany jańǵyrtý boıynsha komıssııa otyrysy ótti. Sol jıynda «Rýhanı jańǵyrý» baǵdarlamasynyń 3 jyldyq nátıjesi qorytyndylandy. Jumys nátıjesine oń baǵa berilip, endigi ýaqytta atalǵan baǵdarlamanyń basym baǵyty ulttyq jańǵyrýdy damytýǵa mán berý kerektigi aıtyldy. Osy oraıda búgingi forsaıttyq zertteý «Rýhanı jańǵyrý» baǵdarlamasynyń odan ári júzege asýyna yqpaly tıedi dep oılaımyn», - dedi QR Aqparat jáne qoǵamdyq damý mınıstrligi «Rýhanı jańǵyrý» baǵdarlamasyn úılestirý departamentiniń jetekshisi Nurlan Kúntýov.

Aıta keteıik, atalǵan konferentsııaǵa sarapshylar jáne túrli sala mamandary qatysty.