«Rýhanı jańǵyrý» baǵdarlamasy aıasynda vedomstvoaralyq baıqaý ótedi
«Qazaqstan Respýblıkasy Bas prokýratýrasy 2014 jyldan beri quqyq qorǵaý jáne áskerı-memleketttik mekemeler arasynda respýblıkalyq vedomstvoaralyq baıqaý ótkizip keledi. Ol sharalardyń basty maqsaty - patrıottyq rýhty kúsheıte otyryp, memlekettik tildi nasıhattaý, kúsh-qýat organdarynda qyzmet etip jatqan azamattardyń eline, jerine, Otanyna degen súıispenshiligin tanytý bolyp tabylady. 2014 jyly «Til - tatýlyq tiregi», 2015 jyly «Til -tutastyq kepili» degen baıqaý ótkizgen bolsaq, bıylǵy taqyrybymyzdyń jóni de, joralǵysy da bólek. Sebebi, bıyl Elbasymyzdyń «Rýhanı jańǵyrý: Bolashaqqa baǵdar» atty baǵdarlamalyq maqalasynda kórsetilgen patrıotızmdi kúsheıtý maqsatynda baıqaý ótkizgeli otyrmyz», - deıdi Bas prokýrordyń keńesshisi Nurgúl Qaraǵoıshına.
Onyń aıtýynsha, bıylǵy baıqaýǵa memlekettik organ ókilderi qatysady. Olar - Bas prokýratýra, QR UQK Shekara qyzmeti, Memlekettik kúzet qyzmeti, Memlekettik qyzmet jáne sybaılas jemqorlyqqa qarsy is-qımyl agenttigi, QR Qorǵanys mınıstrligi men QR ІІM.
«Attary atalyp turǵandaı, bul memlekettik mekemeler elimiz úshin asa mańyzdy iri organdar ekeni belgili. Bıylǵy sharaǵa erekshe mańyz berildi. Bul baıqaý Prezıdent Ákimshiliginiń de baqylaýynda bolmaq. Memlekettik organdar úshin bul mańyzdy», - deıdi ol.
Jalpy baıqaý eki kezeńnen turady. Birinshi kezeń - ár memlekettik qurylymnyń «Rýhanı jańǵyrý» baǵdarlamasyna qatysty atqaryp jatqan qyzmetteri aıasynda tanystyrý rásimin jasaıdy. Ekinshi kezeń - teatrlandyrylǵan sahnalyq kórinis.
«Árıne, bul jekelegen organ bolǵannan keıin ár mekeme baryn salatyny belgili. Sondyqtan, osy saıysqa qatysýǵa atsalysqan organdardyń birinshi basshylary jáne uıymdastyryp júrgen azamattarǵa, qatysyp otyrǵan komandalar rahmetimdi aıtqym keledi», - dep túıdi Nurgúl Qaraǵoıshına.
