«Rýhanı jańǵyrý» baǵdarlamasy aıasynda strategııalyq baǵyt jalǵasady - Dáýren Abaev

NUR-SULTAN. QazAqparat - «Rýhanı jańǵyrý» baǵdarlamasy aıasynda strategııalyq baǵyt jalǵasady. Bul týraly halyqpen eseptik kezdesýinde QR Aqparat jáne qoǵamdyq damý mınıstri Dáýren Abaev málim etti, dep habarlaıdy QazAqparat tilshisi.

«Rýhanı jańǵyrý» baǵdarlamasyna toqtalǵan mınıstr, «Elbasynyń belgilep bergen strategııalyq baǵytyn jalǵastyryp, qoǵamdyq sananyń jańǵyrýyna jol ashý jumysy toqtamaıdy. Bıyl baǵdarlamaǵa 2 jyl toldy. Osy ýaqyt aralyǵynda ınstıtýtsıonaldyq nyǵaıtý, metodıkalyq qamtamasyz etý, jańa jobalardyń tolyǵýy men mazmunnyń artýy baǵytynda birqatar jumystar atqaryldy. Baǵdarlama aıasynda 62 myńnan asa is-shara júzege asyryldy», - dedi D. Abaev.

Osy oraıda mınıstr 2 jyldyń ishinde «Qazaqstandaǵy 100 jańa esim» jobasynda búkilhalyqtyq onlaın daýys berý arqyly 131 jeńimpaz anyqtalǵanyn eske saldy. Ol azamattar óskeleń urpaqqa úlgi bola bildi. Bıylǵy jyly jobanyń úshinshi kezeńi bastalady.

«Týǵan jer» jobasynyń aıasynda 2018 jyly eldegi 2 myńnan asa metsenattyń jumylýymen 2 199 joba júzege asty. Jalpy somasy 109 mıllıard teńgeni quraıtyn is-sharalar ótkizildi. Sonymen qatar, 27 mektep, 115 balabaqsha, 154 mádenı nysan, 41 densaýlyq saqtaý nysany jáne 284 sport nysany salyndy», - dedi Dáýren Abaev.