«Rýhanı jańǵyrý» aıasynda Qaztalovta 75 joba qolǵa alynbaq - BQO
Elbasy N.Á.Nazarbaevtyń «Rýhanı jańǵyrý» baǵdarlamasy aıasynda tuńǵysh ret uıymdastyrylǵan basqosýǵa Qazaqstannyń ár jerinde júrgen 300-ge tarta jerlester jınalyp, týǵan jerge taǵzym etti.
Meımandar aýyldyń kórnekti jerlerin aralap, «Týǵan jerge taǵzym» sharasy aıasynda salynǵan áleýmettik nysandarmen tanysty. Mundaı úlgi alarlyq isti bastaǵan Jalpaqtaldyń 1969 jylǵy túlekteri jaıaý júrginshiler alańy men sýburqaqty iske qossa, 1977 jylǵy azamattar fýtbol alańyn, al 1978 jylǵylar oıyn alańyn salyp bergen edi. Al 1979 jáne 1980 jyly dúnıege kelgender «Meniń júregim Jalpaqtal» jaryq-dıodty kompozıtsııasyn tartý etti.
Jerlester forýmyna qatysqan oblys ákiminiń birinshi orynbasary Arman Óteǵulov óńir basshysy Altaı Kólginovtiń quttyqtaý hatyn tabys etip, týǵan jerge qamqorlyq týǵan elge degen janashyrlyqpen astasatynyn jetkizdi.
Aýdan ákimi Abat Shynybekovtiń aıtýynsha, «Týǵan jer» baǵdarlamasyn júzege asyrýǵa, óńirdiń damyp, qaıta túleýine úles qosqan azamattar az emes. Mysaly, «Týǵan jerge taǵzym» sharasy aıasynda 2009-2017 jyldar aralyǵynda 141,760 mln teńgeni quraıtyn 53 joba júzege asyryldy. Aldaǵy jyldary «Rýhanı jańǵyrý» baǵdarlamasy aıasynda Qaztalovta 75 joba qolǵa alynbaqshy.
Forým aıasynda ózara yntymaqtastyq týraly jeti memorandýmǵa qol qoıyldy. Jerlesterdiń taıaýda 20 mln teńgege demeýshilik jasaıtyny belgili boldy. Atap aıtqanda, «Darhan» sharýa qojalyǵynyń jetekshisi Joldybaı Tapaýov Taldyapan aýyldyq okrýgine qarasty Saryqudyq eldi mekeninde 8 mln teńgege klýb ǵımaratyn salyp bermekshi. Taldyapan aýylynda «Asqar» ShQ jetekshisi Darhan Qydyráliuly altybaqan alańyn salýǵa 800 myń teńge, «Projj Invest» JShS jetekshisi Samat Erjanov Bolashaqta ortalyq saıabaqty abattandyrý jumysyna 1 mln teńge jumsamaqshy.
Eske sala keteıik, budan buryn el táýelsizdiginiń 25 jyldyǵyna oraı kásipker Nurlybaı Joldybaev týǵan jeri Saryqudyq aýylynda óz qarajaty esebinen 5,2 mln teńgege medpýnkt salyp bergen bolatyn.
