«Rýhanı jańǵyrý»: Aqparat mınıstrligi baǵdarlamanyń halyqqa paıdasyn aıtty
Ortalyq kommýnıkatsııalar qyzmetindegi baspasóz máslıhaty barysynda vıtse-mınıstrge áleýmettik jeliden «Baǵdarlamalyq maqala jarııalanǵannan beri 3 jyl ótti. Osy bir qıyn kezeńde baǵdarlamadan qarapaıym halyqqa ne paıda?» degen suraq qoıylǵan edi.
«Onyń paıdasyn qolmen ólsheı almaımyz. Óıtkeni, ózderińiz jaqsy bilesizder, rýhanııattyń óziniń – ólshemi joq dúnıe. Al, endi «Rýhanı jańǵyrý« baǵdarlamasynyń da bul rette, árıne, bir belgili merzimi joq. Óıtkeni, adamnyń sanasynyń, jalpy qoǵamnyń rýhanı damýy – bul kúndelikti júretin úrdis. Al naqty nátıjege keler bolsaq, baıandamamda atap óttim. Atqarylǵan jumys az emes, naqty nátıjeler de bar. Máselen, koronavırýs indeti kezinde qıyndyqtarǵa qaramastan «Týǵan jer« jobasy aıasynda 1200-den astam metsenat azamattarymyzdyń qatysýymen túrli aýyldy aımaqtarda 228 áleýmettik-mádenı mańyzy bar nysan saldy. Bul degenińiz, eń aldymen, sol nysandarda tárbıe alatyn, sol nysandarda bilim alatyn balalarymyzǵa paıdaly», - dedi Bolat Tilepov.
