Rýhanı jańǵyrý: Aqmolada respýblıkalyq ólketaný aktsııasy bastaý aldy
KÓKShETAÝ. QazAqparat - Aqmola oblysynda «Rýhanı» jańǵyrý» baǵdarlamasynyń «Týǵan jer» jobasy sheńberinde respýblıkalyq ólketaný aktsııasy bastaý aldy. Elimiz boıynsha tuńǵysh ret qolǵa alynyp otyrǵan aktsııa sheńberinde Qyzylorda jáne Batys Qazaqstan oblystarynyń mektep oqýshylary Aqmola oblysynyń kıeli jerlerine saıahat jasaýda, dep habarlaıdy QazAqparat tilshisi.
Búgin túske deıin Qyzylorda jáne Batys Qazaqstan oblystarynyń mektep oqýshylary Shýche temirjol vokzalyna kelip jetti. Vozal perronynan olardy Aqmola oblysynyń bilim basqarmasy men BAQ ókilderi qarsy aldy. Áleýmettik jaǵynan az qamtylǵan otbasylardaǵy 134 oqýshy toptarǵa bólinip, Býrabaıdaǵy «Zvezdnyı» balalardy saýyqtyrý ortalyǵyna jaıǵastyryldy.
Aqmola oblysynyń bilim basqarmasy basshysynyń orynbasary Botakóz Dúısenovanyń aıtýynsha, aktsııaǵa qatysýshylar úshin Aqmola oblysynyń kıeli jerleri men Býrabaıdyń kórikti saıahat uıymdastyrylady. Oǵan qosa, túrli mádenı, sporttyq sharalar qarastyrylyp otyr.
«Búgingi kúni elimizde patrıotızm jáne azamat tárbıeleý ıdeıasynyń qoǵamdyq mańyzy artyp, memlekettik mańyzdaǵy tapsyrmaǵa aınalyp otyrǵan jaıy bar. Óıtkeni, búgingi jastar Qazaqstannyń jarqyn bolashaǵy. Sondyqtan, elimizdiń eń ásem jeri Býrabaı baýraıynda osyndaı ıgi sharany ótkizýdiń mańyzy men máni zor. Búgin Qyzylorda jáne Batys Qazaqstan oblystarynyń mektep oqýshylary bizge kelse, odan keıin aqmolalyq balalar bul oblystarǵa saıahat jasaıdy», - deıdi Botakóz Dúısenova.
Búgin aktsııanyń alǵashqy kúni balalar Býrabaı baýraıyndaǵy maral ósirý sharýashylyǵy aýmaǵynda jaqynda ashylǵan kóne dəýirdiń kózindeı kórikti «Jaılaý» etnoaýylynda boldy. Onda balalar qaz-qatar tigilgen qazaqtyń aqshańqaı kıiz úıine kirip, ulttyq taǵamyna dám tatyp, ulttyq ánderdi tyńdap, altybaqan teýip, atqa minip serýendedi.
«Shynymdy aıtsam, Býrabaıǵa kelgenime óte qýanyshtymyn. Jasyl qaraǵaıy men qaıyńy, móldir kólderi kóz tartady. Tabıǵaty óte ásem. Býrabaıdyń sulý tabıǵatyn ǵana tamashalap qoımaı, qazaq halqynyń mádenıetimen tanysyp, jaqsy kóńil-kúıge bólenip otyrmyn. Aldaǵy kúnderi Abylaı han alańy men murajaıynda bolyp, «Han taǵyn» kózben kórý. Bul meniń armanym», - dep óziniń alǵashqy kúngi áserimen bólisti Oral qalasynan kelgen 8-shi synyp oqýshysy Jasmın Beısenǵalıeva.
Uıymdastyrýshylardyń sózinshe, Býrabaı aýdanyndaǵy kıeli jerler boıynsha «Abylaı hannyń ordasy» týrıstik marshrýt ázirlenip otyr. Balalar Býrabaı baýraıyndaǵy Abylaı han alańy, «Han taǵy» jáne Abylaı han murjaıyn aralap kóretin bolady.
Sonymen qatar, jaqynda qylpyna keltirilgen Býrabaı kentiniń murajaıy men «Býrabaı Damý» vızıt ortalyǵynda bolyp, kórikti jerdiń tarıhı men búgingi týraly biraz derekterge qanyǵady. Ekskýrsııa sońynda qyzylordalyq jáne batysqazaqstandyq mektep oqýshylardy Kókshetaý qalasyndaǵy oblystyq ólketaný tarıhı -murjaıy men Maǵjan Jumabaev atyndaǵy oblystyq ǵylymı-ámbebap kitaphanasynda ashylǵan kovorkıng ortalyǵynyń jumysymen tanystyrý josparda bar.
Aıta keteıik, «Zvezdnyı» balalardyń saýyqtyrý ortalyǵy-Aqmol oblysy bilim basqarmasynyń janyndaǵy balalar men jasóspirimderdiń týrızm, ólketaný jáne ekologııa ortalyǵy, memlekettik lageri. Ortalyq Şýche-Býrabaı kýrortty aımaǵynda ornalasqan. Munda respýblıkanyń ár óńirinen kelgen 7-16 jas aralyǵyndaǵy balalar demalady. Ortalyq 10 kún boıy 7 maýsym jumys isteıdi. Munda balalar tolyqqandy demalýyna barlyq jaǵdaı jasalynǵan.
