Rýhanı jańǵyrý: Aqmolada 107 joba júzege asyrylmaq
Sharaǵa barlyq ortalyq jáne jergilikti atqarýshy organdary, sondaı-aq azamattyq qoǵamdyq ınstıtýttarynyń ókilderi qatysty. Oblystyq ishki saıasat basqarmasynyń mamany, «Rýhanı jańǵyrý» baǵdarlamasynyń ÓJO bas menedjeri Ásem Ázirbaevanyń sózinshe, «Rýhanı jańǵyrý» baǵdarlamasy boıynsha 2022 jylǵa deıin 107 jobany júzege asyrý josparlanyp otyr. Onyń ishinde «Tárbıe jáne bilim» kishi baǵdarlamalary boıynsha - 24 shaǵyn joba, «Rýhanı qazyna» boıynsha - 79 joba jáne ulttyq dástúrler men qundylyqtardy, ishki týrızmdi damytý jónindegi is-sharalar, «Atameken» kishi baǵdarlamasy boıynsha - 4 joba qarastyrylǵan.
Semınarǵa arnaıy kelip qatysqan «Rýhanı jańǵyrý» baǵdarlamasynyń respýblıkalyq basqarmasynyń «Tárbıe jáne bilim» kishi baǵdarlamasynyń bas menedjeri, QR Bilim jáne ǵylym mınıstrliginiń mektepke deıingi bilim berý bóliminiń bas mamany Stella Ibraeva «Tárbıe jáne bilim» atty kishi baǵdarlamanyń basty nazary qazaqstandyqtardy básekelestikke, pragmatıkalyq jáne ambıtsıalyq tulǵa retinde tárbıeleýge baǵyttalyp otyrǵanyn atap ótti.
Al, oblystyq mádenıet basqarmasynyń basshysy Sáýle Bóribaeva bolsa, elimizdiń qasıetti oryndaryna engen tarıhı oryndary týraly keńinen aıtyp berdi.
««Qazaqstannyń 100 qasıetti orny» respýblıkalyq tizimine 11 obektimen birge 8 joba endi. Onyń arasynda Ereımentaý aýdanynyń aýmaǵynda Qumaı biregeı arheologııalyq jáne etnografııalyq kesheni bar. Munda birneshe dáýirlerdiń eskertkishteri - qola dáýiri, erte temir dáýiri, ǵun, klassıkalyq túrki jáne etnografııalyq damý kezeńderi saqtalǵan. Eń mańyzdy eskertkishter - bul I-YI ǵasyrlarǵa deıingi Batys túrik qaǵanatynyń kezeńiniń tas músinderi. Osy keshenniń qurylysy bolashaqta ekologııalyq, etnomádenı jáne basqa da týrıstik qyzmet túrlerin damytý úshin alǵysharttar jasaıdy», - dedi basshysy Sáýle Bóribaeva óz sózinde.
Sonymen qatar, Aqmola oblysyndaǵy «Atameken» kishi baǵdarlamasy sheńberinde 2017 jyly 4,8 mıllıard teńge somaǵa birneshe mádenı, tarıhı jáne áleýmettik nysandardy qaıta qurý jáne salý boıynsha 57 joba júzege asyrylýda.
Semınarda áleýmettik mańyzy bar jobalarǵa jurtshylyqty, qoǵam ókilderin tartý arqyly keleshek urpaqty otansúıgishtikke, patrıotızmge tárbıleý, qasıetti jerlerdi BAQ arqyly keńinen nasıhattaý máseleleri aıtyldy.
