Rýhanı jańǵyrý: Aqmola oblysynda buzylǵan kóne qorǵandar qaıta zerttelýde
KÓKShETAÝ. QazAqparat- Aqmola oblysynda buzylǵan kóne qorǵandar «Rýhanı jańǵyrý» baǵdarlamasy boıynsha qaıta zerttelýde, dep habarlaıdy QazAqparat tilshisi.
Tarıhı-mádenı murany paıdalaný jáne qorǵaý ortalyǵynyń málimeti boıynsha, «Arheologtar kúni» qarsańynda qola dáýirine jatatyn atropogendik áserden buzylǵan, XVIII Keńótkel obasy arhelogııalyq eskertkishine bıyl oblystyq arheologııalyq ekspedıtsııa zertteý jumystaryn júrgizdi. Qorǵaý jáne saqtap qalý jumystary sońǵy 11 jyl boıy qolǵa alynyp keledi. Bıylǵy jyldyń basynan beri osyndaı buzylǵan 5 qorǵan zertteldi.
Ortalyq mamandarynyń aıtýynsha, bul teńdesiz tarıhı orynda eneolıt dáýirinen bastap, etnografııalyq zamanǵa deıin jatatyn 200-den astam arheologııalyq eskertkish bar. Bul Aqmola oblysy aýmaǵynda kóne mádenıettiń bolǵanynyń taǵy bir aıǵaǵy.
Arhelogııalyq zertteýler atalmysh qorǵandardyń kóne zamanda tonalǵanyn aıǵaqtap otyr. Bes qorǵannyń úsheýinde sol kezeńde adamdardyń otqa tabynǵanyn bildiretin krematsııalaý belgileri baıqalady. Eki qorǵanda basyn batysqa qaratyp, jerlengen adamnyń qańqasy tabyldy. Sonymen qatar, adam qańqasymen birge jerlengen ydys-aıaqtar da tabyldy. Olardyń sany toǵyz. Keramıkalyq ydystar túrli úlgide geometrııalyq belgilermen bezendirilgen.
Tabylǵan artefaktiler Qazaqstan tarıhyn, onyń ishinde Aqmola oblysy aýmaǵynda bolǵan kóne mádenıet týraly zertteý jumystaryn júrgizýge septigin tıgizbek.
Qazirgi kezde Aqmola oblysy aýmaǵynda 1700 arhelogııalyq eskertkish tirkelgen. Olardyń barlyǵy 20 ǵasyrdyń ortasynda ashylyp, ǵylymı túrde baǵa berilgen. Negizinen arhelogııalyq eskertkishter Zerendi, Eńbekshilder, Bulandy, Atbasar jáne Ereımentaý aýdandary aýmaǵynda anyqtalǵan.
