Rýhanı jańarý aıy - Ramazan qutty bolsyn!

Bul aıda jasalǵan nápil namaz, zikir, sadaqa jáne búkil nápil ǵıbadattarǵa beriletin saýap basqa aılarda jasalatyn paryzdardyń saýabyna teń. Bul aıda jasalǵan bir paryz basqa aılarda jasalatyn jetpis paryzdaı bolady. Bul aıda aýyz bekitken bir adamǵa ıftar berip, aýyz ashtyrǵan adamnyń kúnálary keshiriledi, jahannam otynan qutylady, tozaqtan azat bolady. Sol oraza tutqan adamnyń saýabyndaı saýap aýyzashtyrýshyǵa da jazylady jáne oraza tutqan adamnyń saýaby múldem kemimeıdi.

***

Allanyń rahymy túsken oraza aıynyń bastalýyna oraı, «QazAqparat» HAA Qazaqstan musylmandary dinı basqarmasynyń tóraǵasy, Bas múftı Erjan qajy Malǵajyulynyń Qazaqstan halqyna quttyqtaýyn oqyrmandar nazaryna usynady.

Meıirimdi, raqymdy Allanyń atymen bastaımyn!

Barshamyzdy qasıetti Ramazan aıyna aman-esen jetkizgen Alla taǵalaǵa sansyz shúkirshilik aıtamyz.

Qurmetti musylman baýyrlar!

Álem musylmandary múbárak Ramazanda Allanyń raqymyna bólenýdi úmit etip, saýaby mol izgi amaldardy atqarýǵa nıetti. Sizderdi bir aı boıy jalǵasatyn ulyq Ramazan aıynyń kelýimen quttyqtaımyn! Allanyń raqymy men keshirimine bóleıtin, ár ıgi amal eselenip jazylatyn Ramazandy asyǵa kútken barshamyzǵa bul qasıetti aı qutty bolsyn!

Quran Kárimde aıtylǵan Ramazan aıynyń ereksheligi sol, bul mezgilde jasalǵan kez kelgen qaıyrly amaldyń saýabyn sanaý múmkin emes. Sondyqtan aılardyń sultany bolǵan Ramazan - Alla taǵalanyń musylmandarǵa bergen syıy ári nyǵmeti. Qasıeti men sharapaty mol aıda kúnálarymyzdan arylyp, saýap jınaýǵa, ishki dúnıemizdi tazartyp, Jaratýshyǵa jaqyndaýǵa berilgen múmkindikter kóp. Múbárak Ramazannyń qundylyqtary men qadir, qasıetin jaqsy túsingen izgi adamdar orazaǵa alty aı qalǵan sátten bastap: «Rabbymyz, bizdi Ramazan aıyna aman-esen jetkize gór!» - dep duǵa jasap, Jaratýshymyzǵa jalbarynǵan. Óıtkeni, adamnyń osy aıda ustaǵan orazasy, qosymsha qulshylyqtary, ózgelerge jasaǵan qaıyrymdylyǵy, barlyq saýapty amaldary Allanyń meıirimine bólep, razylyǵyn alýǵa jaqyndata túspek.

Oraza - Alla men adamnyń arasyndaǵy rııasyz qulshylyq, tek Rabbymyzdyń razylyǵyn kózdeıtin ulyq ǵıbadat. Qudsı hadıste Alla taǵala: «Aýzy berik adam iship-jeýin men úshin doǵardy. Oraza - Meni men qulymnyń arasyndaǵy ǵıbadat. Oǵan beriletin syıdy Men ǵana ólshep, Men ǵana beremin. Aýzy berik qulymnyń ashtyq pen shóldegende shyǵatyn aýzynyń ısi men úshin mıskten de artyq» , - deıdi.

Ramazan - rýhanı jańarý aıy. Jerdi meken etken ań men qustyń, barlyq tirshilik ıesiniń jyl mezgilderinde jańarý, túleý, ózgerý úderisinen ótetini belgili. Al Allanyń adam balasyna bergen sheksiz nyǵmeti, teńdessiz syıy sanalǵan oraza - kúnáǵa betpe-bet kelýden saqtaıtyn, jan-dúnıemizdi, minez-qulqymyzdy jaqsylyqqa tárbıeleıtin, rýhanı túlep shyǵatyn qulshylyq. Aýyz bekitýdiń adam ómirin izgilikke bastaıtynyn bilgen pendeniń odan, áste bas tartýy múmkin be?! Olaı bolsa, oraza ustap, uly ǵıbadattyń saýabynan qur qalmaıyq, baýyrlar!

Iman joly sabyrlyq pen taqýalyqty talap etedi. Oraza naǵyz, shynaıy taqýalyq pen sabyrlyqqa jeteleıdi. Quranda Alla taǵala: «Eı, múminder! Senderge burynǵylarǵa paryz etilgendeı oraza paryz etildi. Árıne, saqtanarsyńdar » («Baqara» súresi, 183-aıat), - dep buıyrǵan.

Bıyl shilińgir shildege tuspa-tus kelgen orazada aýyz bekitýge kúnniń ystyǵy nemese basqa da sebepter kedergi bola almaıdy dep senemiz. Sebebi, ımannyń bal dámin tatqan jan Allanyń teńdessiz syıynan shet qalǵysy kelmeıtini haq. Paıǵambarymyz Muhammed (s.ǵ.s.) bir hadısinde: «Rasynda, ár adamǵa óziniń nıet etken nársesi beriledi», - degen. Bul - adam balasy óziniń nıetine oraı, maqsatyna jetedi degen sóz. Kimde-kim saýabyn Alladan úmit etip, oraza ustasa, kúnálary keshirilip, Onyń rızalyǵyna bólenedi. Eki dúnıede de Allanyń rızalyǵyna kenelýden artyq baqyt joq.

Qadirli aǵaıyn!

Qasıetti Ramazan aıy qutty bolsyn! Ustaǵan orazalaryńyz ben duǵa-tilekterińiz qabyl bolǵaı! Ramazan aıynda jasaǵan ıgi isterińiz saýaptan jazylyp, Alla taǵala elimizge, jerimizge berekesin, mol rızyǵyn jaýdyrǵaı! Muratymyz asyl, duǵamyz qabyl bolǵaı!

Áýmın!