Rýhanı kelisim kúniniń tarıhy men búgingi mańyzy talqylandy
JEZQAZǴAN. KAZINFORM — 16 qazanda Jezqazǵan qalasyndaǵy Ulytaý oblystyq tarıhı-arheologııalyq mýzeıinde Rýhanı kelisim kúnine arnalǵan «Rýhanı kelisim – qoǵamdyq birliktiń negizi» taqyrybynda keńeıtilgen dóńgelek ústel ótti.
Іs-sharaǵa oblys ákiminiń orynbasary Baqytjan Jaılaýbaev, dinı birlestikter men etnomádenı ortalyqtardyń ókilderi jáne qurmetti qonaq – «Rýhanı kelisim kongresi» halyqaralyq qoǵamdyq qorynyń prezıdenti, kompozıtor, qoǵam qaıratkeri Tólegen Muhamedjanov qatysty.
Rýhanı kelisim kúni ıdeıasynyń avtory Tólegen Muhamedjanov ataýly kúnniń qalyptasý tarıhy men mańyzyna keńinen toqtalyp, qoǵamdaǵy beıbitshilik pen ózara túsinistikti nyǵaıtýdaǵy rólin atap ótti.
Kezdesýde jańa Konstıtýtsııadaǵy zaıyrlylyq qaǵıdattary, konfessııaaralyq kelisim jáne 7 qazanda ótken Álemdik jáne dástúrli dinder lıderleri sezi Hatshylyǵynyń XXIV otyrysynyń qorytyndylary talqylandy.
Sondaı-aq Ulytaý oblysy Dinı birlestikter klýbynyń jumysy tanystyryldy. Klýb aıasynda túrli konfessııa ókilderiniń qatysýymen birlesken kezdesýler, tımbıldıngter, ulttyq oıyndar jáne qazaq tilin úırený kýrstary uıymdastyrylyp keledi.
Іs-shara sońynda dinı birlestikter men etnomádenı ortalyqtardyń ókilderine oblys ákiminiń atynan quttyqtaý hattar men estelik syılyqtar tabystaldy.
