Rýǵa, jikke bólingen jurt Lıvııanyń taǵdyryn qaıtalaıdy - Elbasy
ASTANA. QazAqparat - Rýǵa, jikke bólingen jurt Lıvııanyń taǵdyryn qaıtalaıdy. Búgin Memleket basshysy Nursultan Nazarbaev aǵymdaǵy jyldy qorytyndylap telearna jýrnalısterine suhbat berý barysynda rýshyldyq dertine qatysty óz pikirin osylaı jetkizdi.
Suhbat barysynda jýrnalıst Beısen Quranbek Prezıdentten rýshyldyq týraly pikirin suraǵan bolatyn. «Qazir rýdyń atyn kóligine, kıimine jazyp alatyndardy kóremiz. Meniń oıymsha, qazaq rýǵa bólinbeıdi, rýdan quralady. Bizdi quraýshy rý bolýy tıis edi. Alaıda jańaǵydaı jaǵymsyz áreketterge ne aıtasyz?» - dep surady Beısen Quranbek. Óz kezeginde Elbasy rýshyldyqty múldem jaqtamaıtynyn alǵa tartty. «Biz at tóbelindeı qazaqpyz. Biz túrikter sekildi 80 mıllıon, orystar sııaqty 140 mln adam emespiz. Eýropanyń kóptegen elinen azbyz. Áreń degende on-on bir mıllıonǵa jetken qazaqty qyryq rýǵa jikteıtin bolsaq, onda el bolmaımyz. Reseıdiń tarıhynda, orystardyń arhıvynda qazaqty qalaı jaýlap alǵandyǵy týraly bári jazýly jatyr. Kóp tarıhshylar da biledi, qazaqty rýǵa, júzge bólip jaýlady. Kerisinshe, qazaq birikken Ańyraqaıda ataqty jaýyna úlken soqqy berdi. Qalaı jeńdi? Basy birikkende jeńdi. «Sen qaı jaqtansyń? Qaı rýdansyń?» dep eshkim suraǵan joq, bar qazaq birikti. Abylaı hannyń janynda ár óńirdiń de batyrlary boldy. Eger biz bundaı dertke iligetin bolsaq, Lıvııa sekildi qurdymǵa ketemiz. Qazir onda taıpalar soǵysyp jatyr deıdi, al bizdiń rýlar sol taıpalar sekildi bolyp ketse ne bolamyz?», - dedi N.Nazarbaev. Sonymen qatar Memleket basshysy el bolý úshin birlikke syzat túspeýi shart ekenin basa aıtty. «Kezinde Vetnamdy alpaýyt Amerıka ala almady. Rýhy kúshti, birligi myqty bolatyn ol eldiń. Bizdiń de el bolýymyz - birligimizge qaraı. Rýshyldyq dertinen keler urpaq ta ada bolýy kerek. Buǵan, ásirese, zııaly qaýym kóbirek zer salýy kerek. Men aǵaıyn-týǵannan alys júrińder dep aıtpaımyn. Toı-tomalaqta kezdesemiz, sol kezde qaljyńdap aıtarmyz áńgimelerdi, bul jaqsy qasıet. Degenmen, rýshyldyqta ary qaraı barmaý kerek. Abaıdyń: «Birińdi qazaq biriń dos, kórmeseń istiń bári bos» degen sózdi ár aýyldyń tórine jazyp qoısa da bolady. Táýelsizdigimizge ólip-óship jetken halyqpyz. Bundaı zaman qazaqtyń basynda buryn-sońdy bolǵan emes. Meniń aıtarym, bizdi syrttan alatyn jaý joq. Birligimiz bolsa, qazaq eshkimge de boı bermeıdi. Biz «arym - janymnyń sadaǵasy» deıtin namysqoı halyqpyz. Sondyqtan da babadan qalǵan amanatty saqtaý úshin bir bolýymyz kerek», - dedi N.Nazarbaev.
