Rýdnyılyq polıtseı ózine qol jumsamaq bolǵan áıeldi qutqardy
QOSTANAI. QazAqparat - Tártip saqshysy ózine qol jumsamaq bolǵan áıeldi qutqaryp qaldy, dep habarlaıdy QazAqparat oblystyq polıtsııa departamenti baspasóz qyzmetine silteme jasap.
Vedomstvoda málim etkendeı, «102» kezekshi pýltine oqıǵa kýágeri sýıtsıd áreketi týraly habarlaǵan. Oqıǵa ornyna Rýdnyı qalasy polıtsııa basqarmasynyń qyzmetkerleri Jánibek Ǵalymhanov pen Nurbek Esqabyl jetti.
Tártip saqshylary kóppáterli úıdiń jıeginde turyp, sekirip ketpek bolǵan áıeldi kóredi.
«Oqıǵanyń jaı-japsaryn túsingen soń áriptesim ekeýmiz sheshim qabyldadyq. Serjant Esqabyl ózine qol jumsamaq bolǵan 52 jastaǵy áıeldi sózge tartyp turdy. Al men kireberis mańdaıshasynyń ústine shyǵyp, áıel turǵan qabatqa qaraı jaqyndadym», - dedi Jánibek Ǵalymhanov.
Polıtseı ózine qol salǵysy kelgen áıeldi dereý páter ishine kirgizdi. Osylaısha, sýıtsıd áreketine tosqaýyl qoıyldy.
