Rýdnyıdaǵy úsh aýrýhana biriktiriledi
QOSTANAI. QazAqparat - Rýdnyı qalasyndaǵy úsh aýrýhana qosylady. Bul týraly óńirlik kommýnıkatsııalar qyzmetinde ótken brıfıngte QR Densaýlyq saqtaý mınıstrliginiń basqarma basshysy Baýyrjan Júsipov málimdedi, dep habarlaıdy QazAqparat.
Rýdnyıdaǵy perınataldyq ortalyq pen balalar aýrýhanasyn qalalyq aýrýhanaǵa qosý týraly másele osy jyldyń tamyz aıynda kóterilgen bolatyn. Aýrýhanalardyń birigýine qarsylyq tanytqan bastamashyl toppen oblystyq densaýlyq saqtaý basqarmasy basshysynyń orynbasary Elena Slobodenıýk jabyq kezdesý ótkizgen-di. Endi bul jıyn tilshilerdiń qatysýmen jalǵasty. Astanadan arnaıy kelgen QR Densaýlyq saqtaý mınıstrliginiń ambýlatorııalyq-emhanalyq kómekti uıymdastyrý basqarmasy basshysy Baýyrjan Júsipov máseleniń mánisin túsindirip berdi.
«Aldaǵy ýaqytta medıtsınalyq mekemelerdi biriktirýdiń nátıjesinde 600 oryndy kópbeıindi keshen paıda bolady. Negizi, halyqaralyq sarapshylar syrqattardy emdeý úshin mýltıdıstsıplınarlyq ádisti qajet dep sanaıdy. Naýqastar úshin barlyq resýrstardy shoǵyrlandyrý qajet, sebebi ol aýrýhanaǵa barǵanda bilikti mamandardyń kómegine júginip, zamanaýı medıtsınalyq jabdyqtardy paıdalanýǵa múmkindik alýy kerek. Al, elimizdegi shaǵynbeıindi medıtsınalyq uıymdar bul máselelerdi sheshpeıdi. Sondyqtan, memlekettik baǵdarlama aıasynda aýqymdy ári sapaly qyzmet kórsetetin kópbeıindi medıtsınalyq keshender qurý týraly sheshim qabyldandy. Óńirlerde densaýlyq saqtaýdyń ınfraqurylymyn damytýdyń uzaq merzimdi josparlary ázirlendi» - dep túsindirdi Baýyrjan Júsipov.
Oblystyq densaýlyq saqtaý basqarmasynyń basshysy Erkin Dáýitbaevtyń aıtýynsha, úsh aýrýhanany biriktirý arqyly 29 mıllıon teńgeni únemdeýge bolady. Sondaı-aq, tósek oryndarynyń sanyn kóbeıip, balalar hırýrgııasy men travmatologııa, reanımatsııa qyzmetterin damytýǵa da múmkindik týady.
«Úsh aýrýhanany biriktirýdiń tıimdiligi kóp. Budan birde-bir syrqat zardap shekpeıdi. Kerisinshe, qalalyq aýrýhanadaǵy kompıýterlik tomografııa balalar úshin qoljetimdi bolady, perınataldyq ortalyqtyń patsıentteri úshin de tıimdi, olar qalalyq aýrýhananyń bilikti mamandarynan tegin keńester ala alady. Keler jyly ońaltý qyzmetin keńeıtemiz, ásirese balalarǵa ońaltý kómekterin kórsetý boıynsha qarjylandyrýdy ulǵaıtýǵa tyrysamyz. Munyń syrtynda Qostanaı-2 shaǵynaýdanda eresekter men balalarǵa arnalǵan ońaltý ortalyǵyn salý úshin ınvestormen kelissózder júrgizilýde. Maman daıarlaý isi de sheshiledi», -deıdi E.Dáýitbaev.
Sonymen, jyl sońyna deıin Rýdnyıdaǵy perınataldyq ortalyq pen balalar aýrýhanasy da eshqandaı qıyndyqsyz qalalyq aýrýhanaǵa birigedi. Jumys rejimi ózgermeıdi. Tek, keler jyldan bastap, birtindep halyqtyń qajettilikterin esepke ala otyryp, qaıta qurý jumystary bastalady.
«Máselen, úsh aýrýhanada da hımııalyq zerthana bar. Árıne, sózsiz bireýi ǵana qaldyrylady. Aýrýhanalarda kir jýý, as daıyndaý sııaqty jıi qaıtalanatyn qyzmetter de turaqty jumys istep tur. Aldaǵy ýaqytta ashanany balalar aýrýhanasynyń bazasynda, kir jýý nysanyn perınataldyq ortalyqta qaldyrýdy kózdep otyrmyz. Sondyqtan, qajet degen mundaı bólimsheler qysqarmaıdy ári tehnıkalyq jáne sharýashylyq sala qyzmetkerleri de zardap shekpeıdi. Zeınet jasyna taıap qalǵandar da jumystan shyǵarylmaıdy»,- dedi Rýdnyı qalalyq aýrýhanasynyń bas dárigeri Talǵat Qaıkenov.
Belgili bolǵandaı, qosymsha qyzmette júrgen zeınetkerler jumystaryn toqtatady. Buǵan qosa kadr jáne býhgalterııa bólimderinde qysqartýlar bolady. Degenmen, aýrýhana basshylyǵy olardyń barlyǵyna jumys taýyp berýge ýáde berdi.
