Rýdnyıdaǵy skeıt-alańda jas kelinshek balalarmen janjaldasyp júr

QOSTANAI. QazAqparat - Qostanaı oblysynda jańadan ashylǵan skeıt-alańda áıelder men jasóspirimder taǵy da janjal shyǵardy. Jaǵa ustatar oqıǵanyń vıdeosy áleýmettik jelide qyzý talqylanyp jatyr, dep habarlaıdy QazAqparat tilshisi.

Vıdeodan jas kelinshektiń velosıped mingen balalarǵa qol kóterip jatqany kórinedi. Ony Instagram paraqshasynda evgeniia4000 nıkimen tirkelgen paıdalanýshy jarııalaǵan. Onyń aıtýynsha, «Gornıak» saýda ortalyǵynyń aldyndaǵy alańqaıda jas kelinshek onyń ulyn balaǵattap, qol kótergen.

Qostanaı oblystyq ІІD ókilderi polıtsııa osy vıdeonyń egjeı-tegjeıin tekserip jatqanyn málimdedi.

Eske sala keteıik, 6 mamyrda da osyndaı jaǵdaı bolǵan edi. Áleýmettik jelide Qostanaı parkteriniń birinde jasóspirim men áıelderdiń oıyn-saýyq quratyn alańqaıǵa talasqan sáti túsirilgen vıdeo taralǵan. Sol kezde áıelderdiń biri ákimshilik jaýapqa da tartylǵan bolatyn.