Rýdnyıdaǵy sábıler úıiniń basshysy jumystan shyǵaryldy

QOSTANAI. QazAqparat – «Nur Otan» partııasynyń janyndaǵy bala quqyqtaryn qorǵaý respýblıkalyq keńesiniń tekserisinen keıin Rýdnyıdaǵy sábıler úıindegi jaǵdaı aıryqsha baqylaýǵa alyndy, dep habarlaıdy QazAqparat partııanyń baspasóz qyzmetine silteme jasap.

«Nur Otan» partııasynyń janyndaǵy bala quqyqtaryn qorǵaý respýblıkalyq keńesiniń tekserisi anyqtaǵandaı, Rýdnyı qalasyndaǵy sábıler úıindegi búldirshinder sumdyq jaǵdaıda ómir súrgeni belgili boldy. Balalar antısanıtarııalyq jaǵdaıda turyp kelgen.

«Balalar úıindegi baqylaýdy álsiretkeni úshin oblystyq densaýlyq saqtaý basqarmasynyń basshysy V. ıÝ. Dýdnıkti sógis túrindegi tártiptik jaýapkershilikke tartý jáne Rýdnyı balalar úıiniń dırektory R. K. Gılıazýtdınovany atqaratyn qyzmetinen bosatý týraly sheshim qabyldandy», - delingen partııanyń baspasóz qyzmeti taratqan málimdemede.

Balalar Qostanaıdaǵy Balalar úıine kóshiriledi. Sondaı-aq, bilim, densaýlyq saqtaý, jumyspen qamtýdy úılestirý jáne áleýmettik baǵdarlamalar basqarmalaryna jetim balalar men ata-anasynyń qamqorlyǵynsyz qalǵan balalarǵa arnalǵan mekemelerde tıisti tekserýler júrgizýge tapsyrma berildi.

Aıta keteıik, Qazaqstandaǵy bala quqyqtary jónindegi ýákil Arýjan Saın Qostanaı oblysynyń Rýdnyı qalasyndaǵy mamandandyrylǵan sábıler úıindegi jaǵdaıǵa qatysty Bas prokýratýraǵa júgingen. Ol ata-anasynyń qamqorlyǵynsyz qalǵan balalar ómir súretin mekemeler tek memlekettik organdardyń emes, qoǵamdyq uıymdardyń da baqylaýynda bolýy kerektigin jetkizgen.