Rýdnyıdaǵy eki kisiniń ólimi: polıtsııa arnaıy top qurdy
QOSTANAI.QazAqparat – Rýdnyı qalasynda eki kisiniń ólimine qatysty isti prokýratýra baqylaýǵa aldy, dep habarlaıdy QazAqparat tilshisi oblystyq Polıtsııa departamentiniń baspasóz qyzmetine silteme jasap.
Qaıǵyly oqıǵa búgin Rýdnyı qalasynda bolǵan.
«Saǵat 11:48-de «102» nómirine jeke turǵyn úı sektorynda qaıǵyly jaǵdaıdyń bolǵany habarlandy. Qalalyq polıtsııa basqarmasynyń ýchaskelik ınspektory habardy tekserý úshin oqıǵa ornyna shyqty. Tártip saqshysy turǵyn úı ishinen 53 jastaǵy er adam men 43 jastaǵy áıeldiń múrdesin tapty. Olardyń zorlyqpen óltirilgeni anyqtaldy», - deıdi polıtsııanyń baspasóz qyzmetindegiler.
Qostanaı oblysy PD bastyǵynyń mindetin atqarýshy Nyǵmet Ysmaǵulovtyń aıtýynsha, atalǵan fakti boıynsha QR QK 99-babynyń 2-bóligimen («Adam óltirý») sotqa deıingi tergeý bastaldy.
«Saraptama taǵaıyndaldy, qajetti tergeý áreketteri júrgizilýde. Tergeý barysyn oblys prokýratýrasy baqylaýǵa aldy. Kúdiktiler izdestirilýde», - dedi Nyǵmet Ysmaǵulov agenttik tilshisine.
