Rýdnyıda jolaýshynyń ólimine kináli avtobýs júrgizýshisi sottaldy
QOSTANAI. QazAqparat - Rýdnyıda 25 jastaǵy er adamnyń ólimine kináli avtobýs júrgizýshisi 2,6 jylǵa sottaldy, dep habarlaıdy QazAqparat oblystyq sottyń baspasóz qyzmetine silteme jasap.
Oqıǵa, 29 sáýir kúni Rýdnyı qalasynda boldy. Jitiqara kentinen kele jatqan mıkroavtobýs jol qıylysyndaǵy BMW avtokóligine soǵyldy. Kólik oqıǵasy saldarynan mıkroavtobýstaǵy 1993 jyly týǵan jolaýshy kóz jumdy. Kólik ishindegi taǵy 10 adam jáne jaıaý júrginshi túrli dene jaraqattarymen aýrýhanaǵa túsken bolatyn.
«Rýdnyı qalalyq sotynyń sheshimimen júrgizýshi kináli dep tanyldy. Oǵan 2 jyl 6 aı kóleminde bas bostandyǵynan aıyrý jazasy taǵaıyndaldy.
Sonymen qatar 3 jylǵa kólik júrgizý quqyǵynan shettetildi», - delingen oblystyq sottyń baspasóz habarlamasynda.
Sottalýshy qaza bolǵan jigittiń otbasyna 1,5 mln teńge materıaldyq shyǵyn óteıdi.
Úkim zańdy kúshine engen joq.
