Rýdnyıda jańadan salynǵan sholý dóńgeleginen aqaý shyqty
QOSTANAI. QazAqparat - Rýdnyı qalasynda 330 mln teńgege salynǵan sholý dóńgeleginen aqaý bilindi. Biraq, bul jóninde merdiger uıym basqasha pikirde, dep habarlaıdy QazAqparat.
Rýdnyı qalasynyń turǵyny sholý dóńgeleginiń durys aınalmaı turǵanyna shaǵymdanyp, áleýmettik jelilerge beınejazba taratqan bolatyn. Alaıda, «AlataýGorStroı» JShS merdigerlik uıymynyń ókili Aleksandr Korenevtiń sózinshe, sholý dóńgelegi paıdalanýǵa berilgen ýaqytta aqaýsyz jumys istegen.
«Bul jerde saıabaq qyzmetkerleriniń nemquraıly qaraýy alańdatady. Beınejazbadan kabınanyń qulpy jabylmaǵanyn baıqaýǵa bolady. Bıiktikke kóterilý kezinde kabınanynyń esigi ashylyp-jabylyp turdy. Bálkim, saıabaq qyzmetkeri qulypty jabýdy umytyp ketken bolar», - deıdi Aleksandr Korenev.
Merdigerlik uıym sholý dóńgeleginiń barynsha qaýipsiz ekenin aıtady. Sapa sertıfıkatynan ótken. Dóńgelekti iske qosar aldynda ornatylǵan konstrýktsııaǵa tolyq tekserý júrgizý úshin reseılik kompanııa mamandary kelgen. Sondaı-aq, sholý dóńgeleginde qatty jel kezinde iske qosylatyn dabyl belgisi ornatylǵan.
Rýdnyı qalasy ákimdigi bul jaıtqa qatysty komıssııa qurǵanyn jetkizdi.
