Rýdnyıda zeınetkerlerdi aldap kelgen alaıaqtar ustaldy

Úsh er adamnan jáne bir áıelden quralǵan alaıaqtar toby Qaraǵandy qalasynan kelgen. Olardyń keltirgen shyǵyn kólemi 5 mln teńgeden asady. Qylmyskerler rýdnyılyq zeınetkerlerdi osy jyldyń aqpan aıynan beri san soqtyryp kelgen.

«Polıtseıler alaıaqtardyń jumys isteý tásilin anyqtady. ıAǵnı, kúdiktilerdiń biri qaladaǵy kez kelgen dúkenge kirip, bul saýda ornyna qaı nómir arqyly qońyraý shalýǵa bolatynyn suraǵan. Dúkenniń telefon nómirin bilip alǵan soń alaıaqtar nómirdiń tek sońy eki sanyn ǵana aýystyryp, ádeıi qate teredi. Eger tutqanyń arǵy jaǵynan egde jastaǵy adamnyń daýysyn estise, áńgimelese bastaǵan. Máselen, jábirlenýshilerdiń birine: «Men sizdiń týysyńyzbyn, qazir Máskeýde turamyn jáne maǵan turmystyq tehnıka satyp alýǵa shuǵyl aqsha kerek», degen. Zeınetker onyń shynymen týysqany ekenine, onyń qıyn jaǵdaıǵa tap bolǵana senip qalyp, qarajat berýge kelisimin bergen. Er adamdardyń biri oǵan áldebir Nıkolaı Petrovıch baratynyn, aqshany sol adamǵa berý keregin aıtqan. San soqqan mundaı jábirlenýshilerdiń qatary 10 adamǵa jetti», – deıdi Rýdnyı qalasynyń polıtsııa basqarmasy bastyǵynyń orynbasary Erbol Kákenov.

Tártip saqshylary jedel tergeý sharalary barysynda alaıaqtardy qalaǵa kezekti ret kelgeninde 9 maýsymda qolǵa túsirgen. Sol ýaqytta aldanǵan zeınetker alaıaqtarǵa 100 teńge sanap bergen.

«Qylmystyq áreketin júzege asyrǵandar Qaraǵandy oblysynyń 18, 27, 26 jáne 24 jastaǵy turǵyndary bolyp shyqty. Qylmyskerler reseılik tirkeýdegi VAZ-2110 kóligimen júrip, oblys ortalyǵynda páter jaldap turǵan. Kúdiktilerden uıaly telefondar men sım-kartalar tárkilendi. Qazirgi ýaqytta QR QK 190-babynyń 3-tarmaǵy («Alaıaqtyq») boıynsha sotqa deıingi tergeý alamdary júrgizilýde. Úsh aıyptalýshy Rýdnyı qalasynyń ýaqytsha qamaý ızolıatoryna jabyldy», - delingen polıtsııanyń aqparatynda.

Polıtseıler alaıaqtar kúdikti qońyraýlar túsken kezde tıisti organdarǵa júginip, bógde tulǵalardy úıge kirgizbeýge keńes beredi.