Rýdnyıda salmaǵy 6 keliden asatyn sábı dúnıege keldi

RÝDNYI. QazAqparat – Rýdnyı qalasynda salmaǵy 6,1 keli, boıy 57 santımetr bolatyn náreste dúnıege keldi, dep habarlaıdy QazAqparat tilshisi Qostanaı oblystyq Densaýlyq saqtaý basqarmasyna silteme jasap.

Batyr bala Rýdnyı qalalyq kópsalaly aýrýhanasynda dúnıege keldi. Aýrýhananyń akýsherlik-gınekologııalyq bóliminiń meńgerýshisi Lıýdmıla Týlebaevanyń aıtýynsha, mundaı jaǵdaı óziniń kópjyldyq eńbek tájirıbesinde birinshi ret bolyp otyr.

«Eljan esimdi sábıdi kesar tiligimen dúnıege ákeldik. Eljan - otbasyndaǵy tórtinshi bala. Áýeli shaqalaqtyń úlken ekenin baıqadyq, biraq mynadaı batyr balany kútpedik. Ana men balaǵa densaýlyq tileımiz», – dep aǵynan jaryldy dáriger.

35 jastaǵy Dınara Erjanova sábıiniń salmaǵy 6 keliden asady dep oılamaǵan.

«Bastapqyda dárigerlerge senbedim. Salmaǵynyń 6 keliden asatynyn boljaǵan da emespin. Tuńǵyshym men ekinshimniń salmaǵy 3,8 keli shamasynda, odan keıingisi 4,6 keli boldy. Eljannyń jaǵdaıy jaqsy. Búgin úıge shyǵaryp qalýy tıis. Quttyqtap jatqan jandarǵa, janymda bolǵan dárigerler qaýymyna alǵysym sheksiz», – deıdi Dınara Erjanova.

Foto: alau.kz