Rýdnyıda polıtsııa qyzmetkeri sábıdi qutqaryp qaldy

Rýdnyı qalasynda oqys jaǵdaı kishkentaı balanyń ómirin qııa jazdady, dep habarlaıdy QazAqparat.

Qostanaı oblysy PD málimetinshe, polıtsııa aǵa serjanty Ádil Qadirbekovtiń jedel áreketi sábıdi qutqarýǵa kómektesken. Patrýldeý kezinde «Ýchaske» jedel-aldyn alý is-sharasy barysynda polıtsııa qyzmetkeri páterlerdi aralap shyqqan. Besinshi qabattan túsip bara jatqan ol kómek surap aıqaılaǵan daýysty estip, tómen qaraı júgiredi.

«Balasy bar áıeldi kórdim, ol náreste tynys almaı jatqanyn aıtty. Barlyq kórshi shyqty. Jedel járdemge qońyraý shaldym, náreste bir kún buryn oryndyqtan qulap ketkeni belgili boldy», - dedi polıtsııa qyzmetkeri.

Telefon arqyly dárigerler dereý áreket etý keregin aıtqan. «Jedel járdem» kezekshi dárigeriniń telefon arqyly bergen habarlamalaryn basshylyqqa ala otyryp, Ádil Qadirbekov alǵashqy kómek kórsetken. Sonyń nátıjesinde bala kózin ashyp, tynys ala bastady. Keıin ony jyly kórpege oraǵan. Kelgen dárigerler polıtseıdiń is-áreketiniń durystyǵyn rastady. Balanyń ata-anasy qyzmetkerge alǵysyn bildirdi.

«Bizdiń ulymyz bir jarym jasta. Kórsetilgen kómektiń arqasynda ulym esin jıyp, alǵashqy demin aldy. Kóp raqmet», - dedi balanyń ákesi.

Endi náreste ózin jaqsy sezinedi. Dárigerler tekserý júrgizip, balanyń jaǵdaıy turaqty ekenin jetkizdi.