Rýdnyıda Nursultan Nazarbaev qorynyń ońaltý ortalyǵy ashyldy

QOSTANAI. QazAqparat – Búgin oblys ákimi Arhımed Muhambetov Rýdnyı qalasynda Elbasy N.Nazarbaevtyń bastamasy boıynsha ashylǵan ońaltý ortalyǵyna bardy, dep habarlaıdy QazAqparat oblys ákiminiń baspasóz qyzmetine silteme jasap.

«Qamqorlyq» ońaltý ortalyǵy Rýdnyı qalalyq kópsalaly aýrýhanasy janynan ashyldy. Jańa ortalyq tirek-qımyl apparaty buzylǵan, týa bitken damý kemistigi jáne júıke júıesiniń basqa da aýrýlary bar muqtaj balalar men jasóspirimderge medıtsınalyq kómek kórsetetin bolady. Ońaltý ortalyǵy Nursultan Nazarbaev qory arqyly qarjylandyrylǵan.

«Ortalyqta barlyq zamanaýı qajetti jabdyqtar jáne ońaltý kabınetteri bar.

Jobalyq qýaty boıynsha bir táýlikte statsıonarda 20 kereýet, kúndizgi statsıonarda 30 kereýet jumys isteıdi. Jylyna 600 balaǵa ambýlatorııalyq kómek kórsetedi. Sondaı-aq, munda jańa MRT qurylǵysy ákelingen.

MRT ornatý úshin nysanǵa jóndeý jumystary júrgizildi, sondaı-aq jabdyqtar ornatyldy», delingen oblys ákiminiń baspasóz habarlamasynda.

Oblys ákimi munan soń «Jas bóbek» balabaqshasynyń ashylýyna qatysty.

Osy jyly ǵımaratqa kásipkerler qarajaty esebinen kúrdeli jóndeý júrgizildi.

Qazir munda 13 top (memlekettik tapsyrys aıasynda 11 top, 2 kommertsııalyq top) 310 bala bar.

Jańa balabaqshany iske qosý Rýdnyı qalasynyń mektepke deıingi mekemelerine kezekti 20%-ǵa tómendetýge múmkindik berdi, sondaı-aq 56 jańa turaqty jumys orny quryldy.

Sapar sońynda Rýdnyı qalasynyń №7 mektep-gımnazııasynyń ǵımaratynda ornalasqan №149 saılaý ýchaskesine baryp, QR Parlamenti Májilisiniń aldaǵy saılaýyna daıyndyqty tekserdi. Atalǵan ýchaskede 2346 saılaýshy tirkelgen.