Rýdnyıda qyzmet barysynda kóz jumǵan polıtseılerge eskertkish qoıyldy
QOSTANAI. QazAqparat – Qostanaı oblysynda qyzmetin atqarý ústinde qaza bolǵan polıtseılerge arnalǵan eskertkish-taqta ashyldy, dep habarlaıdy QazAqparat.
Búginde polıtsııa departamenti jas urpaqty Otanǵa laıyqty qyzmet etý rýhynda patrıottyq tárbıege erekshe kóńil bóledi. Jastar Halyq qaharmany Ǵazız Baıtasovtyń, erlikpen qaza tapqan Shalqar Aqymǵalıev pen Darhan Bazarbaevtyń janqııarlyǵyn úlgi tutady. Buǵan deıin oblystyń birneshe aýdanynda osyndaı eskertkish ashylǵan bolatyn.
Eskertkishti Rýdnyı qalasynyń polıtsııa bólimi men jergilikti ákimdigi birlesip ornatty. Іs-sharaǵa qala ákiminiń orynbasary Elena Skaredına, oblystyq polıtsııa departamenti bastyǵynyń orynbasary Ardaq Yntyqbaev, halyq batyry Darhan Bazarbaevtyń ákesi – Serik Bazarbaev, ishki ister organdarynyń ardagerleri qatysty.
«Bul eskertkish taqtasy – erjúrek áriptesterimizge degen sheksiz alǵysymyzdyń dáleli. Polıtsııa qyzmetkerleriniń óz isin jaqsy kórýi jáne naǵyz kásibı bolýy mańyzdy. Oblysta qyzmettik boryshyn oryndaý kezinde 42 polıtseı kóz jumdy, onyń 11-i qylmyskerdi ustaý kezinde ajal qushty», - dep atap ótti Ardaq Yntyqbaev.
Qala ákiminiń orynbasary Elena Skaredınanyń aıtýynsha, mundaı eskertkish-taqtanyń ashylýy – eshkimdi beı-jaı qaldyrmaıtyn, mańyzdy oqıǵa.
Іs-shara sońynda meımandar polıtsııa bóliminiń jumysymen tanysty, sportzal, murajaı jáne operatsııalardy basqarý ortalyǵynda boldy. Ardaq Yntyqbaev jas polıtsııa qyzmetkerlerimen jáne olardyń tálimgerlerimen kezdesti.
