Rýdnyıda kúıik shalǵan er adam jedel járdem kóliginde kóz jumdy
QOSTANAI. QazAqparat - Rýdnyıda jeke turǵyn úı órtenip, 70 jastaǵy er adam kóz jumdy, dep habarlaıdy QazAqparat oblystyq TJD baspasóz qyzmetine silteme jasap.
«Búgin jeke turǵyn úıdiń 20 sharshy metri janyp ketti. Órttiń taralýy saǵat 10:18-de toqtatylyp, 10:32-de tolyqtaı sóndirildi. Denesin kúıik shalǵan úı ıesi, 1949 jyly týǵan er adam jedel járdem qyzmetiniń kómegimen aýrýhanaǵa jetkizildi»,- delingen vedomstvonyń baspasóz habarlamasynda.
Belgili bolǵandaı, úı ıesi jedel járdem kóliginiń ishinde kóz jumǵan. Órttiń sebep-saldary anyqtalyp jatyr. Er adamnyń denesi sot-medıtsınalyq saraptamaǵa jiberildi.
Buǵan deıin habarlaǵanymyzdaı, Qostanaıda jeke turǵyn úıde bolǵan órt 1941 jyly týǵan áıeldiń ómirin jalmady.
