Rýdnyıda fýtbol akademııasy ashylady
ASTANA. QazAqparat - Qostanaı oblysynyń ákimi Arxımed Muxambetov fýtbol akademııasyn ashýdy josparlap otyr, dep xabarlaıdy QazAqparat tilshisi.
«Bıyl biz Eýrazııalyq toppen (Eurasian Resources Group) kelistik. Olar shamamen 1 mlrd teńge bólip beredi. Oblystyq bıýdjetten de qarjy bólinedi. Sóıtip, ol aqshaǵa kelesi jyly Rýdnyı qalasynda fýtbol akademııasynyń qurylysyn bastaımyz. Sosyn 2020 jyldan bastap «Gornıak» degen komanda bolady», - dedi A.Muxambetov búgin Qazaqstan fýtbol federatsııasynyń XVII konferentsııasynda.
Ákimniń aıtýynsha, qazirgi kezde Rýdnyı qalasynda 130 myń adam turady. Osy ýaqytqa deıin stadıondy qalpyna keltirý jumystary aıaqtaldy. Endi, fýtbol akademııasy ashylsa, komandaǵa qajetti baza bolady.
«Akademııanyń alańynda joǵary sapaly kógal tóseledi. Ony fın kompanııasy jetkizip bermekshi. Kógaldyń bıiktigi - 6 santımetr. Bunyń barlyǵy - sońǵy texnologııalar jáne ÝEFA-nyń talaptaryna saı keledi», - dep atap kórsetti A.Muxambetov.
Aıta keteıik, búgingi konferentsııada Qostanaı oblysynyń ákimi Qazaqstan fýtbol federatsııasynyń atqarýshy komıtetine múshe bolyp saılandy.
Budan bólek, QFF-nyń «Alǵa, fýtbol! Alǵa, Qazaqstan!» atty jańa strategııasy tanystyryldy. Atalǵan qujatta batyl bir maqsat bar. Ol - fýtboldyń qazaqstandyq stılin qalyptastyrý. Sonyń arqasynda Qazaqstannyń fýtboly barsha álemge tanylady degen jospar bar.
Sondaı-aq, jańa strategııada áıelder klýbtaryn arttyrý mindeti belgilenip otyr.
Aldaǵy ýaqytta Qazaqstan fýtbol federatsııasy ortanqol legıonerlerden qutylmaqshy.
Al uıym basshysy Ádilbek Jaqsybekov fýtboldaǵy jemqorlyqpen qalaısha kúresetini týraly aıtyp berdi.
