Rýdnyıda eki áıeldi óltirip, denesin bólshektep tastaǵan qylmysker sottaldy

QOSTANAI. QazAqparat – Qostanaı oblysynyń qylmystyq ister jónindegi mamandandyrylǵan aýdanaralyq sotynyń úkimimen eki áıeldi qasaqana óltirgen Rýdnyı qalasynyń turǵyny sottaldy, dep habarlaıdy QazAqparat oblystyq sottyń baspasóz qyzmetine silteme jasap.

Іs derekterine súıensek, oqıǵa 2020 jyldyń aqpan aıynda Rýdnyı qalasyna bolǵan.

«Sottalýshy P.óziniń jubaıynan jábirlenýshimen jaqyn qarym-qatynasyn jasyrǵysy kelip, as úı pyshaǵymen jábirlenýshiniń moınyna pyshaqtaǵan. Áıel oqıǵa ornynda kóz jumdy. Budan ári P. qylmysyn jasyrý úshin jábirlenýshiniń ájesin de óltirgen. Munan soń eki áıeldiń denelerin bólshektep, Tobyl ózenine aǵyzyp jiberý úshin páterindegi balkonǵa jasyryp qoıǵan. Sottalýshynyń qylmysy saraptamalardyń qorytyndylarymen dáleldendi. Aıta ketý kerek, qaıtys bolǵan áıelderdiń múgedektigi bolǵany anyqtaldy. P. buǵan deıin de qylmys jasap, sottalǵan. Sot jasalǵan qylmystardyń aýyrlyǵyn, jeńildetetin jáne aýyrlatatyn mán-jaılardy eskere otyryp, sottalýshyǵa ómir boıy bas bostandyǵynan aıyrý túrindegi jaza taǵaıyndady», delingen sot habarlamasynda.

Sottalýshy Qylmystyq kodekstiń 99-baby 2-bóligi boıynsha aıypty dep tanyldy. Jazasyn qaýipsizdigi barynsha joǵary qylmystyq - atqarý júıesi mekemesinde óteıdi. Úkim zańdy kúshine engen joq.