Rýdnyıda tsement zaýyty iske qosylady
QOSTANAI. QazAqparat - Ústimizdegi jyldyń maýsym aıynda Rýdnyıda salynyp jatqan tsement zaýyty paıdalanýǵa beriledi, dep habarlaıdy QazAqparat.
Zaýyttyń bas meńgerýshisi Artem Maklasovtyń aıtýynsha, nysannyń qurylys jumystary bitýge taıaý.
«Qazirgi ýaqytta qurylys 98%-ǵa aıaqtalyp tur. Maýsym aıynda pesh jaǵýdy bastaımyz. Osy aıda jolǵa qajetti shıkizattar jetkiziledi. Jaqynda zaýyt ishindegi aınalmaly peshtiń qosý-baptaý jumystaryn júrgizý úshin arnaıy qurylǵylar satyp alyndy. Bizdiń mamandarǵa peshti durys jaǵý men onyń baptaýlaryn úıretý úshin Belogorod tehnıkalyq ýnıversıtetiniń qyzmetkerleri keledi. Olar zaýytty iske qosý protsesi kezinde de bolady», - dedi A.Maklasov.
Bul zaýyttyń basty jańalyǵy - «400» markaly tsement shyǵarylady. Al mamandardyń aıtýynsha, tsementtiń osy túri sýlfatqa tózimdi, uzaq saqtalady. Sondaı-aq, arnaıy qospalar aralasqan «500» markaly tsement te óndiriledi.
Oblys ákimi Arhımed Muhambetov osy tsement zaýytynyń kómegimen birneshe áleýmettik nysan men turǵyn úıler salýǵa bolatynyn aıtty. Tıisinshe, óńir basshysy oblystyq kásipkerlik basqarmasyna memtapsyrysqa qatysatyn kompanııalarmen keńesip, osy suraqty talqylaýdy tapsyrdy.
«Kelisimshart jasaý úshin ónim kólemin anyqtap alyńyzdar. Buǵan qosa bizden óndiriletin tsementti basqa óńirlerge usyný qajet. Ásirese, BQO, Aqmola oblysy men Astana qalasyna shyǵý kerek. Árıne, aldymen oblystyń qajettiligin óteýdi kún tártibinen túsirmeńizder. Tsement suratyp otyrǵan jergilikti kompanııalar barshylyq», -dedi A.Muhambetov.
Aımaq basshysy Rýdnyıdan shyǵatyn tsement baǵasyn Reseıden ákelinetin ónim qunymen birdeı qylýdy tapsyrdy. Sebebi, eksportqa shyǵarylatyn óndiristik ónim baǵasy kemimeýi tıis.
