Rýdnyıda buzaqylar 5 mln teńgeniń altynyn urlap ketken
QOSTANAI. QazAqparat – Rýdnyı qalasy polıtsııa basqarmasynyń qyzmetkerleri quny 5 000 000 teńge bolatyn altyn buıymdaryn urlaýǵa qatysy bar kúdiktini ustady, dep habarlaıdy QazAqparat Qostanaı oblysy polıtsııa departamentiniń baspasóz qyzmetine silteme jasap.
Oqıǵa Rýdnyı qalasy Korchagın kóshesindegi «GÝM» saýda ortalyǵynyń býtıkteriniń birinde bolǵan. Belgisiz azamat jertóledegi edendi buzyp, zergerlik dúkenge kirip, urlyq jasaǵan.
«Jedel tergeý is-sharalary barysynda polıtsııa qyzmetkerleri 24 jastaǵy er adamdy ustady. Kúdikti kinásin tolyq moıyndady. Bul azamat tonaýshynyń urlap ákelgen zattaryn satýǵa kómektesken», - deıdi Rýdnyı qalasy krımınaldyq polıtsııa bóliminiń bastyǵy Maksım Grekov.Qazirgi ýaqytta ekinshi kúdiktiniń kim ekeni anyqtaldy. Ony ustaý sharalary qabyldanýda. Osy derek boıynsha QR QK 188-baby 3-bóligimen sotqa deıingi tergeý júrip jatyr. Urlanǵan zat Qostanaı qalasynyń lombardtarynan jartylaı tárkilendi.
