Rýdnyıda boıjetken er adamdy óltirdi
QOSTANAI. QazAqparat - Rýdnyıda tanystardyń kóńildi otyrysy qaıǵyly jaǵdaımen aıaqtaldy, dep habarlaıdy QazAqparat.
Oblystyq sottyń baspasóz qyzmetiniń habarlaýynsha, oqıǵa bıylǵy tamyzda bolǵan. Rýdnyı turǵyny keshke kóshede tanys eki boıjetkendi kezdestirip, olardy úıine qonaqqa shaqyrǵan.
«Saǵat túngi 01:00 shamasynda er adam men boıjetkenderdiń biri dálizge shyǵyp, urysa bastaǵan. Urys kezinde boıjetken as ishetin bólmege kirip, ústel ústinde jatqan pyshaqty alyp, qaıta dálizge shyqqan. Onda turǵan jigittiń keýde tusyna úsh ret pyshaq suqqan. Er adam alǵan jaraqaty saldarynan oqıǵa ornynda kóz jumdy», - dep habarlady oblystyq sottaǵylar.
Oqıǵadan keıin eki boıjetken jábirlenýshiniń úıin tonap úlgergen. Bireýi úıden gaz plıtasyn shyǵarsa, ekinshisi ólgen jigittiń qaltasyndaǵy aqshasyn ala ketken. Endi olar jasaǵan qylmystary úshin sot aldynda jaýap beredi.
