Rýdnyıda boks mektebi salynady
QOSTANAI. QazAqparat - Rýdnyı qalasynda jańa boks mektebi salynýy múmkin. Bul týraly búgin qala ákimi Baqytjan Ǵaıazov esep berý jıynynda aıtty, dep habarlaıdy QazAqparat tilshisi.
Rýdnyı qalasynda boks sportyn damytý úshin keshendi sharalar qolǵa alynbaq. Qala ákimi Baqytjan Ǵaıazovtiń sózinshe, jergilikti atqarýshy bılik bul suraqty kún tártibinen túsirgen emes. Osyǵan deıin halyq ıgiligine jumys istep kelgen boks mektebi eskirgen. Sondaı-aq, ol bankke kepilge qoıylǵan ári kúrdeli jóndeýdi qajet etedi.
«Rýdnyıdaǵy boks sportynyń tarıhyn el biledi. Sonyń jemisi, Olımpıada oıyndarynyń júldegeri Ivan Dychko da bizdiń maqtanyshymyz. Odan basqa da el chempıonatynda jaqsy nátıje kórsetip júrgen sportshylar jetkilikti. Sondyqtan bul sport túrin damytý úshin keshendi sharalardy jalǵastyramyz. Qazirgi ýaqytta bizde V.Shaer atyndaǵy boks mektebi bar. Degenmen, ol bank kepildiginde tur. Ony qaıtaryp alý úshin 27,5 mln teńge qajet», - deıdi Baqytjan Ǵaıazov.
Rýdnyı basshysy aıtqandaı, qalada jańa sport mektebi boı kóteredi. Nysannyń jobalyq-smetalyq qujattaryna 40 mln teńge qarastyryldy. Jospar boıynsha, jańa sport mektebinde eki úlken rıng bolady. Jobalyq-smetalyq qujattar daıyn bolsa, jyl aıaǵyna deıin mekteptiń qurylysy bastalady.
