Rýdnyıda bes myń qus janyp ketti
QOSTANAI. QazAqparat - Rýdnyı qalasyndaǵy qus fabrıkasynda órt shyqty, dep habarlaıdy QazAqparat oblystyq TJD baspasóz qyzmetine silteme jasap.
Búgin tańǵy saǵat 5.11-de Rýdnyı qalalyq órtke qarsy qyzmet bólimine «Jas qanat-2006» JShS qus fabrıkasynda órt bolyp jatqandyǵy týraly habar kelip tústi. Byltyr salynǵan 1 qabatty nysan tilsiz jaý qursaýynda qalǵan.
«Órt 110 sharshy metr aýmaqty sharpydy. Saldarynan 5126 bas qus janyp ketti, sondaı-aq nysannyń jabdyqtaryna zalal tıdi. Materıaldyq shyǵyn anyqtalyp jatyr. Adamdar zardap shekken joq», - delingen TJD baspasóz qyzmetiniń habarlamasynda.
Aldyn ala boljam boıynsha, órtke elektr jelileriniń qysqa tuıyqtalýy sebep bolýy múmkin.
