Rýdnyıda bazarǵa «bomba qoıǵan» 34 jastaǵy er adam eki jylǵa sottaldy
QOSTANAI.QazAqparat – Rýdnyı qalasynda «bomba» qoıylǵany týraly jalǵan habarlama taratqan er adam sottaldy, dep habarlaıdy QazAqparat oblystyq polıtsııa departamentiniń baspasóz qyzmetine silteme jasap.
Buǵan deıin habarlaǵanymyzdaı , 2020 jylǵy 17 naýryzda polıtsııaǵa Oktıabrdiń 50 jyldyǵy kóshesindegi «Bak-Bak» bazaryna «bomba» qoıylǵany týraly anonım habarlama túsken. Tergeý amaldaryn júrgizý barysynda osy aqparat tekserildi.
Jarylǵysh zat tabylǵan joq. Jedel-izdestirý is-sharalarynyń nátıjesinde, polıtsııa qyzmetkerleri jalǵan habar taratqan 34 jastaǵy er adamdy anyqtady.
Jalǵan aqparat taratqan er adamǵa qatysty sot 11 maýsymda ótti.
«Rýdnyı qalalyq soty Qylmystyq kodekstiń 273-baby boıynsha aıyptalǵan 35 jastaǵy jergilikti turǵynǵa qatysty úkim shyǵardy. Sot oǵan 2 jyl merzimge bas bostandyǵynan aıyrý jazasyn taǵaıyndady. Sonymen qatar, er adam arnaıy qyzmetterdiń kúsh-quraldaryn jalǵan shaqyrǵany úshin materıaldyq shyǵyndy tolyq ótedi» delingen polıtsııanyń aqparatynda.
