Rýdnyıda avtobýs órtenip ketti
QOSTANAI. QazAqparat - Rýdnyı qalasynyń ortalyǵynda avtobýs órtke orandy, dep habarlaıdy QazAqparat.
Oqys oqıǵa vokzal mańynda bolǵan. Rýdnyı qalalyq tótenshe jaǵdaılar bóliminiń habarlaýynsha, búgin saǵat 15:06-da avtobýstyń órtengeni týraly habar túsken.
«Avtovokzal mańynda «GSUH 290 M 12» markaly avtobýs órtke orandy. Kólik 1989 jyly paıdalanýǵa berilgen. Tútin akkýmýlıatordyń tusynan shyqqan. Keıin jalyn qozǵaltqysh bóliktegi symdarǵa tıip, tutanǵan», - delingen TJ kezekshi bóliminiń habarlamasynda.
Jalyn 5 sharshy metr aýmaqty sharpydy. Órt saǵat 15:27-de tolyǵymen sóndirildi. Bastapqy málimet boıynsha, oqys oqıǵadan eshkim zardap shekpegen.
