Rýdnyıda alıment boryshyn óteý úshin turǵynnyń úıi satyldy

QOSTANAI OBLYSY. QazAqparat – Rýdnyıda alıment bereshegin óteý úshin úı satyldy. Jeke sot oryndaýshysy Aleksandr Qojamuratov alıment bereshegin óndirip alý boıynsha úlken jumys atqardy, dep habarlaıdy QazAqparat Qostanaı oblysy JSO óńirlik palatasynyń baspasóz qyzmetine silteme jasap.

2019 jylǵy 3 qyrkúıekte alıment óndirý týraly atqarýshylyq is qozǵaldy. 2017 jylǵy 1 qyrkúıekten bastap 2021 jylǵy 1 qańtarǵa deıingi bereshek 1 826 227 teńge somasynda aıqyndaldy.

«Rýdnyı qalasy sotynyń 2019 jylǵy 12 jeltoqsandaǵy uıǵarymymen boryshkerdiń menshiginde bolǵan Rýdnyı qalasyndaǵy turǵyn úıdi óndirip alý jolymen sot sheshimin oryndaý tásili men tártibi ózgertildi», - dedi Qostanaı oblysy JSO óńirlik palatasynyń basshysy Nesibeli Basenova.

2021 jylǵy 13 qańtarda tyıym salynǵan jyljymaıtyn múlikti májbúrlep satý nátıjesi boıynsha úı elektrondy aýktsıonda 2.039.400 teńgege satyldy.

Tıisinshe, alıment boıynsha qaryz tolyq kólemde óteldi.