Rýdnyıda 200 stýdent basqa oqý ornyna aýystyrylady
QOSTANAI. QazAqparat - Rýdnyı tehnologııa jáne servıs kolledji kelesi jyly óz qyzmetin toqtatady, dep habarlaıdy QazAqparat.
Rýdnyı qalasyndaǵy tehnologııa jáne servıs kolledji kelesi jyldan bastap óz jumysyn toqtatady. Bul shara, eń aldymen, bıýdjet qarjysyn únemdeýge baǵyttalǵan. Kolledj dırektory Tólegen Jabýlovtyń aıtýynsha, búginde oqý ornyn ońtaılandyrýdyń egjeı-tegjeıli jospary ázirlengen.
«Bizdegi aspaz-kondıter, shashtaraz, kontroler-kassır mamandyǵynda oqıtyn stýdentter taý-ken tehnologııa kolledjine, naýbaıshy men tiginshiler áleýmettik-gýmanıtarlyq kolledjge, al avtoslesarlar men avtoelektrıkter qurylys jáne kólik kolledjine aýystyrylady. Qazirgi mindet - osy bilim mekemeleri jańa mamandyqtardy oqytý úshin 2019 jyldyń 1 naýryzyna deıin lıtsenzııany alýy qajet. Eger úlgermese, kolledj óz jumysyn ýaqytsha jalǵastyra beredi. Osy oraıda muǵalimder de, tehnıkalyq personal da jumyssyz qalmaıdy», - dep sendirdi ol.
Búginde kolledjde 350 stýdent oqıdy, onyń 125-i - bitirýshi túlekter. Qalǵan 225-niń oqýlaryn basqa bilim mekemesinde jalǵastyrýyna týra keledi. Oblystyq bilim basqarmasyndaǵylar ońtaılandyrýdyń nátıjesinde úlken ǵımaratty ustap turýǵa ketetin qomaqty qarajat únemdeletindigin alǵa tartady. Únemdelgen qarajat basqa kolledjderdiń materıaldyq-tehnıkalyq jaǵdaıyn jaqsartýǵa baǵyttalmaq.
