Rýdnyıda 15 jasar oqýshy beti ashyq jatqan qudyqqa túsip ketti
QOSTANAI. QazAqparat – Rýdnyı qalasynda 15 jasar oqýshy beti ashyq jatqan tereńdigi 4 metrlik qudyqqa qulap ketti, dep habarlaıdy QazAqparat.
Oblystyq TJD baspasóz qyzmetiniń málimetinshe,oqıǵa Rýdnyı qalasyndaǵy «Dostyq» saıabaǵynyń mańynda bolǵan.
«Jasóspirim dosymen birge saıabaqta serýendep júrgen. Kenet beti ashyq qalǵan qudyqqa túsip ketti. Qasyndaǵy dosy birden órt sóndirý qyzmetine qońyraý shalǵan. Oqıǵa ornyna Rýdnyı qalasynyń qutqarýshylary jumyldyryldy. Olar arqandy paıdalanyp, tereńdigi 4 metr qudyqtan jasóspirimdi alyp shyqty», - delingen vedomstvonyń aqparatynda.
Jábirlenýshi oblystyq balalar aýrýhanasynda jatyr. Al TJD mamandary beti ashyq qalǵan qudyqqa qatysty tergeý sharalaryn júrgizýde.
