Rýdnyı turǵyny páterin bótelkelerge toltyryp qoıǵan
QOSTANAI. QazAqparat — Rýdnyıda páterlerdiń birinde gaz plıtany teksermek bolǵandar bos bótelke úıindisin tapty. Bul týraly Qostanaı oblystyq polıtsııa departamentiniń baspasóz qyzmeti aıtty, dep habarlaıdy QazAqparat tilshisi.
Belgili bolǵandaı, Rýdnyı polıtsııasyna gaz qyzmetiniń qyzmetkerlerine esikti ashpaǵan 40 jastaǵy er adamnyń kórshileri shaǵym túsirgen. Bul páterdegi gaz plıtasyna tehnıkalyq tekserý júrgizýge kedergi keltirgen. Osyǵan baılanysty sol kireberistegi páterlerge gaz berý toqtatyldy.
«Er adam Rýdnyı qalalyq PB qyzmetkerleri, ákimdiktiń turǵyn úı ınspektsııasy ókili, gaz qyzmetiniń qyzmetkeri men kórshiler kelip turǵan soń páter esigin ashty. Páter antısanıtarııalyq jaǵdaıda bolǵany anyqtaldy. Kóptegen bos bótelkeler shashylyp jatqan. Osyǵan baılanysty, páter ıesine bir aıdyń ishinde páterdi qoqystan tazartý úshin ýaqyt berildi», - dep túsindirdi oblystyq PD baspasóz hatshysy Irına Bejenar.
Gaz qyzmetiniń qyzmetkerleri tehnıkalyq tekserý júrgizgennen keıin gaz berildi.
Alaıda, osy páterge bir aptadan keıin tekserýge kelgen polıtseıler páter ıesiniń úıindini tazartpaǵanyn anyqtady.
Sondyqtan, Rýdnyı polıtsııa basqarmasy qala ákimdiginiń turǵyn úı-kommýnaldyq sharýashylyǵy bólimine jáne SES-ke hat joldaıdy.
