Rýdnyı turǵyny áıelin kóshe boıynda shashynan súıregen
QOSTANAI. QazAqparat - Qostanaı oblysynda er adamnyń áıelin kóshege alyp shyǵyp, uryp-soqqany túsirilgen beınejazba áleýmettik jelilerde qyzý talqylanýda, dep habarlaıdy QazAqparat tilshisi.
Rýdnyı qalasynyń ІІB atalǵan iske baılanysty sotqa deıingi tergeý sharalaryn bastady. Belgili bolǵandaı, 33 jastaǵy qala turǵyny dene jaraqattaryn alǵan.
«Rýdnyı qalasy ІІB áleýmettik jelidegi «Tıpıchnyı Rýdnyı» paraqshasyndaǵy vıdeony zerttedi. Vıdeoda belgisiz er adamnyń áıeldi uryp-soqqan áreketteri kórinedi. Dene jaraqatyn salý faktisi anyqtalyp, QR QK 293-baby 1-bóligi («Buzaqylyq») boıynsha sotqa deıingi tergeý sharalary bastaldy» - delingen oblystyq ІІD baspasóz qyzmetiniń habarlamasynda.
Polıtsııa qyzmetkerleriniń jedel-iz kesý sharalary kezinde 33 jastaǵy jábirlenýshi men 35 jastaǵy kúdiktiniń Rýdnyı qalasynda turatyny belgili boldy.
Kúdiktiniń kinási anyqtalsa, osy bapta kórsetilgendeı, eki myń aılyq eseptik kórsetkish mólsherinde aıyppul tóleýge, sol mólsherdegi túzeý jumystaryna tartylý nemese eki jylǵa deıingi merzimge bas bostandyǵynan aıyrý jazasy qoldanylady.
Eske salaıyq, áleýmettik jelilerde er adamnyń áıeldi jol boıynda shashynan súıregen beınejazbasy jarııalanǵan. Áıelge arasha túsýge kelgen kýágerlerge er adam onyń óz áıeli ekenin jáne kózine shóp salǵanyn aıtqan. Alaıda, áıel bárin joqqa shyǵaryp, onyń mas ekenin alǵa tartyp, kómek suraǵan.
