Rýdnyı turǵyny anasyn baltamen qorqytyp, qamap qoıǵan
QOSTANAI. QazAqparat - Qostanaılyq tártip saqshylary balasy qamaýda ustap otyrǵan áıeldi qutqardy, dep habarlaıdy QazAqparat oblystyq PD baspasóz qyzmetine silteme jasap.
Oqıǵa Rýdnyı qalasyndaǵy 50 let oktıabrıa kóshesinde bolǵan. Kópqabatty úıdiń páterinen shyqqan janjaldy kórshileri estip, turǵyn úı kooperatıvi ıesiniń tóraǵasyna qońyraý shalǵan. Sońǵysy polıtsııaǵa habarlasyp, kómek shaqyrǵan.
«Oqıǵa ornyna kelgen kezde esikti asha almadyq. Páterge esik jóndeýshiniń kómegimen ǵana kirdik. Páter ishi qarańǵy, qoqysqa toly boldy. Dáliz boıymen júrgen soń qolyna balta ustaǵan er adamdy kórdik. Ol sýyq qarýmen anasyn qorqytqan», -dedi jergilikti polıtsııa qyzmetiniń aǵa ınspektory Erlan Ábdilmanov.
Polıtseıler «sotqar uldyń» qolynan baltasyn tartyp aldy. Belgili bolǵandaı, anasyn qamap ustaǵan 56 jastaǵy er adam psıhıatrııalyq aýrýhananyń tirkeýinde turǵan. Tártip saqshylary ony ary qaraı emdeý úshin arýhanaǵa jetkizdi.
